Prezidente Konsellu Administrasaun BNCTL nian, António Vitór esplika, ajénsia foun ne’e atubele hakbesik servisu bankaria nian ba komunidade no kliénte sira.
"Ajénsia ne'e sei oferese servisu bankaria báziku sira hanesan atendimentu kaixa, abertura konta depozitus, simu no prosesa aplikasaun kréditu, tranferensia ka remensas no servisu seluk ne'ebé klientes nesesita", hatete António, hafoin lansa ajénsia foun ne'e, iha Suku Kuluhun, kuarta (14/04).
Nia hatutan, ajénsia foun ne'e, sei reforsa servisu husi funsionáriu sira hamutuk ema na’in-sanulu, inklui responsável ema ida.
Diretór BNCTL, Brigido de Sousa hatuta, internalmente sira hahú uza iha fulan-novembru tinan 2020. Bainhira halo inaugurasaun ba edifísiu foun BNCTL iha Rejiaun Administrativa Espesial Oekussi Ambeno (RAEOA).
"Iha ne'ebá, ami lansa tiha ona, maibé tanba ami sei iha faze teste nia laran hela, entaun sei uza internalmente. Signifika katak funsionáriu banku sira ne’e uza hotu ona internet banking. Ne'ebé foin mak loron ida-rua ne'e mak ami aprontu para atu lansa ba públiku", dehan nia.
Maibé, mellora hela rede banku nian inklui seguransa sira, atu lansa ba ema hothotu kliente ne'ebé iha konta poupansa, kompaña sira ne'ebé iha konta BNCTL iha TL nomós rai liur.
"Agora dadauk ne'e, ami lansa ona, maibé ami fó sim card ida ba kompaña ka ba individual ne’ebé hakarak para sira bele uza internet iha sim card ida ne'e, sira bele asesu ba internet banking", hateten nia.
Tanba ne'e, husu ba kompaña sira ne’ebé hakarak uza internet bangking, bele rejista, tanba funsionáriu prepara hela sim card BPE nian hamutuk rihun-ida ba internet banking.
Kritériu ba públiku ne'ebé hakarak uza internet banking, tenke iha konta bankária BNCTL nian, bele depozitu ka kréditu.
"Sé nia iha konta BNCTL, nia bele mai rejista no bele hetan internet banking, ne'e para nia check nia ballansu, bele halo transferénsia entre konta iha BNCTL, bele hola pulsa telemor”, haktenik nia.
Iha lansamentu ba ajénsia foun ho sistema banku internet ne'e, BNCTL mós halo introdusaun kona-ba "Depozitu Matenek" ne’ebé oferese ba estudante hodi bele halo transferénsia.(*)
