Ho akontesimentu ne’ebe hamosu sofrimentu barak ba komunidade sira, tanba iha balun ne’ebé lakon hela fatin no iha balun lakon vida. Husi ne’e hafanu fuan Emprezáriu Bandido Qualidade hodi fó apoiu solidariedade ba nia maluk Timoroan sira maka sai vítima tanba afeita husi inundasaun ne'e.
Haree ba solidariedade, Emprezáriu ne'e ho voluntáriu fó apoiu fós saka rihun ida ba família afeitadu inundasaun iha kapitál Dili.
Apoiu ne’ebé Bandido oferese, haree ba situasaun ne’ebé komunidade sira enfrenta, tanba impaktu husi udan no anin durante loron rua hamosu inundasaun halo komunidade barak mak lakon hela fatin no hahán.
Emprezáriu Bandido Qualidade hatete, nia parte ho fuan tomak hakarak fó apoiu solidaridade ba família afeitadu sira ne'ebe presiza ema hotu nia loke liman.
"Razaun ou inisiativa ha'u foti desizaun hodi tulun, hirak ne'ebé kona inundasaun, tanba bee nalihun iha sira-nia fatin, maioria dezloka mai ha'u-nia fatin, depois balun tanis, halerik, tanba dehan impaktu serka sánitaria para servisu, no sira-nia osan rezerva oituan sira ne'ebé rai durante ne'e, maioria sosa hotu fós”, dehan nia ba www.tempotimor.com liuhusi telefone, segunda (05/04).
Info : Foos ne'ebe prepara ona hodi lori ba fahe daudaun ba komunidade afeitadu husi inundasaun iha Kaptral Dili, Segunda (5/4) Foto Suplai
Komunidade afeitadu sira halerik ba hahán, tanba sira nia nesesidade bázika sira bee hoban estragu hotu.
“Fós hirak ne'ebé sira hola, problema inundasaun ne'e bee mai hoban hotu, tan ne'e sira deside mai husu tulun ba ha'u, no husi loron ne'e kedan ha'u deside kontaktu xefe aldeia na'in-2, haruka sira prepara fixa kada família”, esplika nia.
Nune'e, lista ne'ebé parte nia hetan kuaze rihun ida-resin, entaun deside prepara fós karon rihun ida hodi fahe ba sira.
"Balun ne'ebé dezloka tahan iha ha'u-nia fatin, ha'u laiha fatin ne'ebé di'ak liu, mais ha'u dehan iha loron hirak liuba, loron rua ou tolu ba oin imi bele toba tahan iha ha'u-nia fatin, no ha'u koko prepara hahán ba imi, karik loron ida ou rua tán governu prepara ona fatin seguru, ita-boot sira bele dezloka”, afirma nia.
Fós hirak ne'ebé ohin fahe ona ba komunidade afeitadu sira iha área tasi tolu.
Nune’e, Komadante Sentru Formasaun Polísia Nasionál Timor-Leste (PNTL), Superientende Arquimino Ramos, afirma parte seguransa akompaña hodi fahe fós ne'ebé Bandidu Kualidade apoiu ba vítima inundasaun sira.
"Sira apoiu fós saka rihun ida, atu fahe ba sira afeitadu dezastre naturál ne'e, sira entrega direita ba sidadaun sira, ami akompaña la'o hamutuk ho sira de'it”, dehan nia
Maske, hetan akompaña husi PNTL maibé laiha dadus konkreta ba númeru benefisiáriu, tanba fahe iha refiziadu Dom Bosco-Komoro, no fatin balun. (*)