SEKOOP-SEJD Distribui Fós Ba Família Afetadu 200 iha Samatana

Sekretáriu Estadu Kooperativa (SEKOOP), Elizário Ferreira ho Sekretáriu Estadu Juventude no Desportu (SEJD), Abrăo "Nokosiku" Saldanha, simbolikamente entrega hela fós saka ida ba Apati ne'ebe reprezentante komunidade sira neebé afetadu ba inundasaun iha aldeia Samatana, Suku Bairru Pite, Postu Administrativu Dom Aleixu, munisipiu Dili, segunda (05/04 Sekretáriu Estadu Kooperativa (SEKOOP), Elizário Ferreira ho Sekretáriu Estadu Juventude no Desportu (SEJD), Abrăo "Nokosiku" Saldanha, simbolikamente entrega hela fós saka ida ba Apati ne'ebe reprezentante komunidade sira neebé afetadu ba inundasaun iha aldeia Samatana, Suku Bairru Pite, Postu Administrativu Dom Aleixu, munisipiu Dili, segunda (05/04 Foto Tempo Timor

Tempotimor (Dili)- Sekretáriu Estadu Kooperativa (SEKoop), Elizário Ferreira, hamutuk ho Sekretáriu Estadu Juventude no Desportu (SEJD), Abrăo "Nokosiku" Saldanha, distribui fós ba família sira ne'ebé afetadu ba inundasaun hamutuk na'in-200 iha aldeia Samatana, Suku Bairru Pité, Postu administrativu Dom Aleixu, Munisípiu Dili, segunda (05/03).

Sekretáriu Estadu Kooperativa (SEKoop), Elizário Ferreira hatete, hafoin akontese udan boot durante loron hahú husi loron 03 to'o 04 fulan-abríl tinan 2021 ne'e, hodi rezulta inundasaun iha fatin hotu iha kapitál Dili.

Liuhusi koordenasaun ho Xefe aldeia Samatana, ikus mai sira tun hodi observa direta inklui halo levantamentu dadus ba komunidade afetadu sira.

"Atividade mak, ami halo levantamentu dadus ne'e, ami tun direta ba komunidade afetadu sira hodi hatene direta sira-nia kondisaun real, tanba komunidade afetadu ne'e barak no sira hasoru duni problema menus ai-han, entaun ohin ita distribui”, hatete SEKoop, Elizário Ferreira hafoin distribui fós ba komunidade afetadu sira iha aldeia Samatana, segunda (05/04).

 

 

Sekretáriu Estadu Juventude no Desportu (SEJD), Abrăo "Nokosiku" Saldanha hatutan, komunidade barak mak enfrenta problema inundasau, tanba ne'e, iha dadus balu mak autoridade lokál sira halo hela identifikasaun.

Hafoin identifikasaun, sei entrega ba sala jestaun risku dezastre nian iha Sekretária Estadu Protesaun Sívil (SEPS) nia fatin, mak sei kanaliza tomak ba SEKoop ho SEJD.

"Agora, ida ne'e ita hanesan aguenta dadaun ona, tanba sira ne'e la konsege salva hahan ruma husi horseik kalan kedan, tanba bombeiru mós tama ladi'ak, sira lakonsege evakua sai husi ne'e”, dehan SEJD, Nokosiku.

Xefe Aldeia, Samatana, Suku Bairru Pite, Isaias Saúl Gusmăo de Oliveira informa, nia komunidade sira ne'ebé afetadu ba inundasaun ne'e, hamutuk xefe família 200, no distribuisaun fós ne'e realiza ba nia komunidade sira tanba, parte rua tun observa direta hodi rekolla mós dadus.

"Iha ne'e, xefe família iha 200, entaun ohin ha'u fó hatene ba sekretáriu estadu na'in-rua, ohin sira aloka fós hamutuk saka 200 mak, ohin haruka mai ona”, hatete nia.

Durante mosu inundasaun, komunidade hasoru problema hahán laiha, tanba fós ne'ebé uza maiória mak estraga husi bee sa'e.

Tanba ne'e, nia dehan, fós hamutuk saka 200 ne'e, sei distribui ba kada xefe família hetan fós saka ida, hodi sustenta netik ba loron balu.

"Aleinde fós, sé bele karik, ami husu ba estadu ou ministériu kompetente atubele haree took mina, ou sasán bázika seluk hanesan toba fatin. Tanba ha'u-nia komunidade hirak ne'e, kuaze barak mak sira-nia sasán ou toba fatin ne’e, lakon hotu, inklui sira-nia sasán hodi tein, ida ne'e mós ami presiza hotu”, afirma nia.

Entretantu, totál populasaun iha aldeia Samatana, hamutuk 1800 resin, ho xefe família ka uma-kain hamutuk atusrua ne'ebé sofre hela ba inundasaun. (*)

Rate this item
(0 votes)
Last modified on Monday, 05 April 2021 18:49
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Right256

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« April 2021 »
Mon Tue Wed Thu Fri Sat Sun
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30    

Tempo Timor Networks

Online Counter