Maske workshoop ne'e realiza de'it liuhusi "Zoom meeting", maibé hala'o iha ámbitu ida amigável tebes entre jestór kooperativa sira hotu iha nivel internasionál ninian.
"Reuniaun ka worshop kona-ba jestór sira-nian ne'ebé mak ha'u rasik hola parte hanesan jestór ne'ebé mak hetan konvite direta husi Asian Cofederation Credit Union (ACCU)”, hatete Elizário Ferreira ba jornalísta sira iha nia kna'ar- fatin Akait, tersa (30/03).
Iha worshop ne'e oradór sira ko’alia foka liuba asuntu kooperativa nian, liliu kona-ba oinsá mak atu dezenvolve atividade ida ne'ebé fó nia kontribuisaun ba dezenvolvimentu umanu, dezenvolvimentu setór real nomós dezenvolvimentu teknolójiku.
Nia mós hala'o reuniaun ho aliansa kooperativa internasional sira hodi ko’alia kona-ba progresu kooperativa iha Timor-Leste nian, tanba aliansa kooperativa internasional ho ninia misaun ida mak hakarak atu suporta kooperativa sira iha rai laran.
"Entaun, reuniaun ne'e hala'o ho ámbitu ida amigável teb-tebes durante iha loron 26 to'o 27, e sei kontinua aban ho reuniaun ida via zoom ho aliansa kooperativa internasional ho sira-nia reprezentantasaun iha Timor”, dehan nia.
Aliansa kooperativa internasional nian iha TL, ida mak Uniaun Europeia (UE) rasik, ne'ebé kontinua iha loron kuarta (31/03), tanba tuir nia haree iha progresu di’ak hodi halo preparasaun hasoru situasaun covid19, nune'e servisu kooperativa sira labele mate.
"Sé lockdown ne'e termina, saida mak atu halo. Ne'e signifika katak fó kontinuasaun ba programa ne'ebé iha. Maibé sé lockdown ne'e kontinua nafatin iha, saida mak ita tenke halo.Ida ne'e mak sai preukupasaun parte sekretária estadu nian atu kontribui ba estabilidade ekonómiku nasaun nian”, hatete nia. (*)