Iha Kinta (06/06), MAP halo lansamentu ba Loza Agrikultura dahuluk iha Timor Leste. Loza ne'e nu'udar esforsu governu nian hodi hakbesik merkadu ba agrikultor sira.
"Depois de tempu naruk ita hakarak iha loza agrikultura nian. Loza ne'e ba ita-nia agrikultór sira, ba ita nia toos nain sira, ba produtór sira. Ida ne'e tempu naruk, ne'ebé ita halo esforsu koletivu ida ne'ebé parseria ho Jica, Japaun, ita konsege hamosu ita-nia loza Agrikultura ba agrikultór sira ba dahuluk iha Timor. Ida ne'e mak ita-nia esforsu no hakbesik ona merkadu ba ita-nia produtór sira iha Timor laran", dehan Ministru Agrikultura no Peska t Joaquim José Gusmão bainhira halo lansamentu ba loja agrikultura iha Timor Plaza, Kinta (06/06/2019).
Ministru esplika, importansia husi lansamentu Loza Agrikultura ne'e atu promove produtu lokal iha Timor Leste hanesan produtu ne'ebé di'ak, saudavél no produtu ne'ebé mak hetan naran di'ak liu iha Timor.
Nia hatutan, Governu ho parseria JICA kontinua apoiu produtor sira hodi promove produtu lokal atu hetan fatin iha merkadu.
Aleinde oferese oportunidade ba agrikultór sira faan sira nia produtu, loza ne'e mós sei fornese hahaan organika ba povu Timor Leste.
"Ita iha merkadu tradisional, mais ida ne'e esforsu ida ne'ebé mak akumula hotu asosiasaun sira, liu-liu ba fatin ne'ebé ita fó asistensia hamutuk ho Jica nia programa ba hasa'e produsaun nian ba foos nian iha área irigasaun Gruto no mós Maliana", dehan Ministru Joaquim.
Ba dahuluk, loza ne'e foin estabelese iha Kapital Dili, hafoin bele haluan tan ba munisipiu sira seluk bainhira iha ona progresu.
MAP rekoñese katak durante ne'e agrikultor sira ladub iha inisiativa atu halo produsaun tanba maske sira produs barak maibé ema la sosa.
"Entaun ho loza agrikultór ne'e ita bele promove sira-nia produtu. Fó fali fiar ba sira katak sira kuda ka prodúz tanba iha ona fatin par sira fa'an ba", dehan ministru Joaquim.