Antes governu aplika serka sanitária iha kapital Dili hodi limita movimentasaun komunidade nian, Ai-leva José sei bele hetan osan bainhira fa’an, maibé tempu agora laiha ona redimentu maske la’o to’o kalan.
José Pires (80) ne’ebé hakiak oan hamutuk na'in-4, mane hotu, sai husi uma iha oras madrugada leba malus fa'an iha Dili laran, to'o meudia laiha rendimentu.
“Sai manu kokorek dala rua tuku 4 ou 5 hanesan ne'e, tanba tun mai sei la'o-la'o bá merkadu lama, hau to'o iha kaikoli ona malus ema la hola ne'e”, nia espresa lamentasaun ne’e hafoin deskansa husi fa'an malus iha Largo Lesidere, segunda (22/03).
Durante moris ho ai-leba, nune'e maske situasaun serka sanitária no konfinamentu obrigatóriu, maibé tenke la'o tun-sa'e hodi fa'an sasán.
"Ita-nia moris mak ida ne'e, estadu ne'e labele bandu, ita mak buka ita-nia moris, sé estadu bandu fó fali osan mai para hola labarik sira-nia sapatu, roupa, hahán buat hotu ba eskola”, dehan nia.
Bainhira la fa’an nia labele hetan osan hodi sustenta nesesidade família loroloron, tanba moris haleu Díli laran hodi fa’an malus.
"Han hemu mak ida ne'e loos de'it ne'e ita atu halo nusá, ita buka para han, buka para hemu, osan ne'e ita rai la di'ak”, haktenik nia
Tuir observasaun www.tempotimor.com iha terenu nota katak, José Pires leba malus to'o largo Lesidere iha tuku 12:00 tur deskansa hafoin kontinua la'o bá fa'an, maibé laiha ema ida sosa, nune'e malus to'o namlaek hotu. (*)
