Helmia Alkatiri hatete, situasaun Covid-19 iha Timor-Leste lori impaktu la di’ak ema barak, liuliu estudante sira ne'ebé estuda iha Dili, tanba hahán komesa menus ona, no labele sai ba munisipiu hodi foti hahán.

Haree ba realidade sira ne'ebé akontese, família Neil ho nia kaben hola inisiativa rasik buka esforsu hodi sosa ai-han no distribui fali ba estudante sira ne'ebé oras ne'e enfrenta hela problema ai-han.

"Ami-nia prezensa mai to'o iha ne'e, hanesan maun ho alin, família, mak ami to'o iha ne'e, laiha buat ida liu ida ne'e. Buat hanesan umanidade, ita haree ba malu, ita hotu iha susar nia laran, la'ós alin sira de'it, la'os ami de'it”, dehan Helmia Alkatiri ba jornalista sira hafoin distribui ai-han ba estudante sira iha Aldeia Klak-fuik, Suku Bekora, Postu Administrativu Cristo Rei, Munisípiu Dili, sábadu (20/03).

Situasaun Covid-19, aumenta ho situasaun governu nian, halo ekonómia ida la'o ladi'ak teb-tebes, tanba afeta ema hotu, husi nivel nasional to'o baze.

"Ne'ebé ami hakat mai iha ne'e hanesan maun, alin mak mai ne'e, ajuda netik buat ka hahán ruma para bele ajuda ita nia-alin sira ba loron ida nia laran”, dehan Helmia.

Maske nune’e, Neyl ho família sei bele buka tan apoiu husi ema ruma, no família, hodi bele ajuda ba estudante sita ne'ebé presiza.

"Ami lakohi promete buat barak, tanba ita hotu iha situasaun ida ne’ebé susar”, haktenik nia.

Enkoraja mós estudante no joven sira ne'ebé eskola hela iha Dili, atu labele lakon esperansa, maibé forsa nafatin hodi hasoru dezafiu sira, tenke estuda maka'as hodi prepara-an sai líder iha futuru.

Situasaun iha TL oras ne'e, la'os de'it kauza husi pandemia global surtu Covid-19, maibé situasaun polítika iha rai laran mós nakdoko no iha buat barak mós tenta atu hafahe timoroan sira-nia fiar ba malu.

"Maibé ha'u nia hakarak no ha'u hatene joven barak nia hakarak mak ba timor nia di'ak de'it”, apela nia.

Tanba ne'e, nia hatutan, sé de'it mak sai ukun, importante lori Timor ba oin hodi hetan futuru ne'ebé di’ak ba oan no bei-oan sira.

"Ita hakarak Timor ne'e buras liután, Timor tenke ba oin, tenke buras liután. Ita independente tinan barak ona, mais sei hanesan ne'e nafatin. Ha'u husu ba estudante sira eskola nafatin, tau ulun, hodi estuda, tanba loron ida Timor sei presiza ita”, dehan nia.

Nia prefere, rekursu timoroan sira nian tenke sai barak liu tan, hodi nunee labele fó fatin ba ema seluk atu mai ukun, timoroan sira mak tenke hamutuk lori nasaun RDTL ba oin.

Tanba timoroan mós la'os ema beik, maibé iha ema matenek barak, maske oportunidade mak seidauk iha atu hatudu.

Estudante husi UNTL, Octavio dos Santos Soares hato'o nia agrase wa'in ba apoiu ne'ebé fó husi família Neyl, tanba bele ajuda ona nia iha tempu balu nia laran.

"Ami agradese tebes ba apoiu ne'ebé mana ho maun sira fó mai ami, no ida bele ajuda ona nesesidade loron balu nian. Maske apoiu ne'e naton, maibé ida ne'e ba ha'u boot tebes. Susesu nafatin ba mana ho maun iha futuru”, nia agradese.

Estudante na'in-16 ne’ebé simu apoiu ne’e mai husi Munisípiu Manatutu na’in-10, Manufahe 1, Bobonaru 1, Vikeke 1, no 1 husi Aileu.(*)