Tuir loloos, aviaun Trans Nusa ne’e halo ona operasaun iha 29 Maiu 2019 foin lalais ne’e, maibé sira iha operasaun téknika balun ne’ebé seidauk kompleitu entaun sira adia fali ba loron 14 Juñu.

"Operasaun Dili-Kupang no Kupang-Dili, kada semana ida dala rua, iha loron Segunda no Sesta”, dehan prezidente AACTL, Ana Rosalia Ximenes Varela, Ministru Transporte Komunikasaun, Kaikoli,  Segunda (3/6).

Aviaun Trans Nusa iha Governu anterior para ona tanba pasajeiru ladun barak. Maibé iha 2019, sira husi Trans Nusa mak hasoru-malu hodi halo komitmentu, atu halo operasaun fali Dili-Kupang ba-mai.

Nia esplika, prosesu ba aviaun ida atu halo operasaun iha Timor ba nasaun ida ne’e la fasil, iha kritéria barak inklui iha buat barak neebé presiza halo akordu, maibe buat hotu loos ona, hein deit sira halo operasaun.

“Iha sira nia kustu ne’ebé fó mai ami husi US$ 45.00 to’o US$ 85.00 kada pasajeiru. Entaun bainhira ami haree ba sira nia kustu tiket ne’e, entaun ami hasai karta lisensa, ne’ebé servisu hamutuk ho ANATL fó lisensa para sira bele halo operasaun”, dehan Ana.

Tuir Autoridade, kustu tiket ne’ebé husi Aviaun Trans Nusa fó mai ne’e husi AACTL garante sei la hamosu dezentendimentu husi aviaun sira ne’ebé halo hela operasaun iha Timor-Leste ba Nasaun viziñu.

Aviaun ne’e rasik sei tula pasajeiru hamutuk 78 kada viajen husi Kupang-Dili ba mai.