Sekretáriu Estadu Kooperativa (SEKoop) Elizário Ferreira, esplika objetivu husi semináriu ne'e atu konsolida forsa no matenek atubele hatán ba situasaun Post COVID-19.
“Kuandu COVID-19 ne'e hotu saida mak sei akontese, iha dezenvolvimentu ka laiha dezevolvimentu, iha progresu ka lae no saida mak akontese, sé COVID-19 ne'e la'o naruk ba tán,” Governante ne’e informa jornalista sira iha Federasaun Hanai Malu (FHM), kuarta (03/03).
Elizário hatutan, daudaun ne'e movimentu kooperativa kréditu ne'ebé eziste ona ho totál membru hamutuk rihun 29, maibé membru sira-ne'ebé sei ativu iha rihun 17 de'it, tanba ne'e sira iha responsabilidade rasik atu asegura sira-nia kapitál finanseira ne'ebé rai iha kooperativa.
“Oinsá mak atu sirkula osan sira-ne'e, oinsá mak asegura sustentabilidade kooperativa nian, asegura estabilidade finanseira ka ekonómiku kooperativa nian atu nune'e bele asegura bein-estár membru kooperativa sira-nian no ba povu tomak nian,” dehan nia.
Iha fatin hanesan, Prezidente Kooperativa Lakon Nakukun Mosu Naroman (LANAMONA), Domingas dos Santos, elojia no agradese ho movimentu kooperativa iha tempu ikus ne’ebé hahú la'o di’ak ona, tanba ho lideransa husi Sekretáriu Estadu Kooperativa (SEKoop), Elizário Ferreira nian kuaze territóriu nasionál iha ona movimentu kooperativa.
“Ami-nia prezensa iha-ne'e mós ami hakarak fahe esperiénsia nu'udár kooperativa ida-ne'ebé harii kedas iha tinan 2008 ho nia dezáfiu no progresu barak ne'ebé ami hetan, ami mós hakarak fahe iha oportunidade ida-ne'e,” nia akresenta.(*)