Print this page

SEKoop Sertifika Ona Funsionáriu Na'in-46 iha Nível Formadór

Sekretáriu Estadu Kooperativa (SEKoop), Elizário Ferreira ko'alia ba Jornalista sira iha nia kna'ar fatin Akait, Tersa (2/3) Sekretáriu Estadu Kooperativa (SEKoop), Elizário Ferreira ko'alia ba Jornalista sira iha nia kna'ar fatin Akait, Tersa (2/3) Foto Tempo Timor

Tempotimor (Dili) — Durante iha fulan janeiru to'o fevereiru, Sekretaria Estadu Kooperativa (SEKoop), sertifika ona funsionáriu sira hamutuk ema na'in-46 ba iha nível formadór nian.

Sekretáriu Estadu Kooperativa (SEKoop), Elizário Ferreira, informa funsionáriu hamutuk na'in-46 ne'e sai ona hanesan formadór iha nasionál, inklui na’in-38 ne'ebé prepara ona atu atende pedidu komunidade sira nian husi baze.

“Oras ne'e daudaun iha janeiru to'o 28 fevereiru, parte SEKoop halo ona sertifikasaun ba formadór ema na'in-46, sira-ne'e hanesan formadór nasional, no 38 formadór sub-nasionál, ka ema bolu munisípiu preparadu atu atende ba pedidu husi komunidade, bazeia ba inisiativa komunidade nomós hala'o programa formasaun edukasaun ne'ebé maka ajendadu iha parte SEKoop nian,” Governante ne’e informa ba jornalísta sira iha nia kna'ar-fatin, Akait, tersa (02/03).

Nia hatutan, daudaun ne'e rejista ona kooperativa hamutuk 214 mak sei ativu, maibé iha atus-ida-rua (102) nu'udár kooperativa kréditu, no atus-ida-sanulu-resin-tolu (113) nu'udár kooperativa produsaun.

“Kooperativa kréditu akomoda ema hamutuk rihun 29, no kooperativa produsaun akomoda ema hamutuk rihun 24 maka hola parte iha kooperativa, ho kapitál konta husi kooperativa produsaun, kooperativa kréditu hamutuk kuaze millaun $12 ne'ebé akomodadu husi Kooperativista sira,” informa nia.

Nia fó hanoin katak, daudaun ne'e, munisípiu hotu-hotu eziste ona kooperativa, tanba husi Postu Administrativu 65 ne’e, iha 33 mak eziste ona kooperativa, no sei hela postu 32 mak seidauk iha kooperativa.

“Tanba ida-ne'e tama iha ajenda prioridade SEKoop nian katak molok tinan ida ne'e konklu kooperativa kréditu ne'e tenke iha sub-distritu sira hotu,” nia promete.(*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items