BCTL hakarak klarifika, katak konta ne’ebé iha Federal Reserve Bank of New York nu’udar fundu Estadu Timor-Leste nian no rejista hodi BCTL nia naran ne’ebé jere relasaun entre BCTL no Federal Reserve Bank of New York.
Lei prevee ona katak, governu apenas iha konta ida de'it iha BCTL. Bainhira de’it governu Timor-Leste hakarak halo levantamentu husi konta Fundu Petrolíferu, Ministru Finansas simplesmente haruka instrusaun transferénsia ida mai BCTL, hafoin prosesu polítika hotu konklui no públika ona iha Jornál da Repúblika, enkuantu restante prosesu ne’e kompeténsia husi BCTL nian.
"BCTL akompaña hela notísia ne’ebé sirkula iha públiku kona-bá asesu ba konta Fundu Petrolíferu governu nian ne’ebé mak rai iha Federal Reserve Bank of New York. BCTL nunka hetan impedimentu atu asesu ba konta Fundu Petrolíferu iha Banku Federal Reserve New York, nomós laiha indikasaun ruma husi Federal Reserve Bank of New York atu hakarak foti medidas ba asaun refere," tuir komunikadu imprensa ne'ebé fó sai husi BCTL, kinta (25/02/).
Tuir Governadór katak, situasaun ne’e kontráriu tebes, tanba Federal Reserve Bank of New York kontinua sai nafatin parseiru valiozu no konfiante ne’ebé fó ona sira-nia apoiu másimu ba BCTL iha jestaun Fundu Petrolíferu, dezde inísiu tinan 2005.
Nia hatutan, hahú kedas husi tinan 2001 Timor-Leste iha ona relasaun ne’ebé di’ak tebes ho Banku Federal reserve, ne’ebé fasilita ona prosesu pagamentu hotu, ne’ebé simu hosi BCTL relasiona ho fundu petrolíferu nomos operasaun bankária sira seluk tan.
Iha komunikadu ne'e, Governadór BCTL apela ba públiku no média sira hotu, atu hapara rumoris sira ne’ebé mak espalla ona, no iha futuru mai husu ba públiku no média tenki verifika faktu sira iha BCTL ka Ministériu Finansas, molok repete rumoris ne’ebé la ho justifikasaun kona-bá jestaun Fundu Petrolíferu. (*)