Sekretáriu Estadu Kooperativa (SEKoop), Elizário Ferreira, haktuir funsionáriu hamutuk na'in-38 ne'e forma antes husi sekretária estadu sesante ne'ebé destakadu iha munisípiu 12 nu'udár pontu fokál SEKoop nian.

Maibé durante tinan rua ona funsionáriu sira-ne'e laiha tarefa servisu, tanba ne'e maka SEKoop organiza hikas formasaun ba funsionáriu sira atu bele hala'o fali servisu foun iha munisípiu sira hotu ho nível formadór.

"Tarefa foun ke sira simu, SEKoop rasik sei atribui ba sira hanesan formadór, organizadór, mobilizadór, dinamizadór no motivadór ba dirijente kooperativa sira iha nível postu no suku atu sira bele motivadu," dehan Elizário Fereira ba www.tempotimor.com hafoin sai oradór ba semináriu ne'ebé realiza iha Federasaun Hanai Malu (FHM), Lanud, Bairru-Pite, Dili, kuarta (24/02).

Nia husu atu funsionáriu sira bele komprende di'ak liután papél hanesan dirijente kooperativa ida hodi eduka ema no populasaun ein-jerál atu hola parte iha kooperativa.

"Tanba ne'e maka formasaun ne'ebé hala'o ba sira, tuir duni sira-nia tarefa traballu ne'ebé aban-bainrua sira sei halo ba oin sira halo ho papél hanesan ohin ha'u temi ne'e", tenik nia.

Nia hatutan, matéria ne'ebé nia lori iha formasaun ne'e ko'alia kona-ba planu reseita no despeza família nian tanba atu sai formadór, tenke hatene matéria ne'e hodi eduka populasaun sira bele hatene buka osan, hatene gasta osan, no hatene poupa osan.

"Sé lae, ita-nia povu lahatene oinsá atu gasta osan, oinsá atu depozita osan, entaun sira sei simu, sira sei halo de'it ezbanjeamentu ba sira-nia osan rasik", esplika nia.

Nia fó zemplu, durante ne'e populasaun iha TL barak liu maka asesu ba osan terseira idade, asesu ba veteranu, asesu mós ba bolsa da mãe, maibé osan sira-ne'e kuaze la sirkula iha nível baze, tanba uza hotu ba sosa fós no sosa buat sira-ne'ebé importadu.

Nia esplika formasaun ne'e eduka funsionáriu sira oinsá hatene uza osan no hatene poupa osan bele ba rai iha kooperativa ka rai iha banku, atu nune'e bele asegura sira-nia oan no sira-nia família nia futuru.

"Ida-ne'e maka objetivu prinsipál husi formasaun ne'e, atu atribui ba sira servisu hodi serví ita-nia povu. Labele manán osan estadu, depois la serví povu, ne'e laloos," nia hakotu.(*)