Tuir Diretór Ezekutivu Fongtil Daniel Santos do Carmo katak, governu tenke asegura nesesidade báziku ba populasaun Covalima no Bobonaro ne'ebé iha hela serka sanitária.
"Ita lakohi atu sira mate tamba virus i depois mate tanba hamlaha, entaun oinsa mak governu atu asegura nesesidade báziku iha munisípiu rua ne'ebé implementa hela serka sanitária," dehan Daniel iha Palásiu Prezidensiál Bairu-pite, Kuarta (24/2).
Daniel akresenta, governu iha rekursu naton hanesan fundu Covid hodi asegura populasaun nia nesesidade báziku liu-liu ligadu ho ai-han, tamba ne'e governu presija asegura stock iha Sentru Nasional Logístika (SLN) nune'e antisipa bainhira populasaun infrenta krize ai-han.
Entertantu iha munisípiu ne'ebé dadaun ne'e iha hela serka sanitária mak munisípiu Bobonaro no Covalima, ne'ebé munisípiu Covalima rejistu ona kazu pozitivu Covid-19 hamutuk na'in neen iha aldeia Clau-Halek suku Belulik Leten, Postu Administrativu Fatumean.(*)
