Tuir Elizário Ferreira, kompañia implementadór sira ne'ebé durante ne'e servisu hamutuk ho SEKoop hodi hala'o atividade distribuisaun aihan Sesa Bázika ba populasaun sira programa rekuperasaun ekonómika, kuaje pursentu 70% mak governu halo ona pagamentu ba sira.
Elizário haktuir, bainhira iha prosesu aplikasaun dokumentu, iha kompañia hamutuk 69 mak submete sira nia dokumentu ba SEKoop , hodi halo avaliasaun ba ida ne'ebé mak prienze kritériu hodi distribui sesta bázika ba populasaun sira. Maibé iha rezultadu katak kompañia 27 mak sai manan na'in, maibé iha kompañia rua mak diskualifikadu entaun hela kompañia 25 de'it mak eziste.
"Pagamentu ba kompañia implementadór sira hahú ona iha segunda ne'e, parte ministériu implementadór reuni ona i osan iha ona no halo ona pagamentu kuaze pursentu 70% ba kompañia sira ne'ebé sai hanesan implementadór," dehan Elizário ba www.tempotimor.com iha Lanud Bairru-pite, Kuarta (24/2).
Nia hatutan, atu kompleta pagamentu, presiza kompañia sira konklui ona distribuisaun ba ai-han Sesta Bázika, depoia mak Ministériu Finansas kompleta pagamentu, nune'e bele atinje 100%.
"Komesa semena ida ne'e, dalaruma osan iha ona, ne'ebé sei tama iha ida-idak nia konta bankária," tenik Nia.(*)