Asuntu ne'e, hato'o relasiona ho atividade inspesaun ne'ebé sira hala'o ba fatin prosesamentu Bee GOTA iha Aldeia Aimutin, Suku Komoro, Postu Administrativu Dom Aleixo, Munisípiu Dili, sexta (12/02).
Nia hatete, iha tinan 2021 sai hanesan oportunidade ida di'ak ba governu nia programa iha períudu planu rekuperasaun ekonómika nian, tanba governu nia parseiru boot mak setór privadu sira.
Tuir nia, durante ne'e emprezáriu nasionál sira-nia atividade la'o avansu tebes, ho ida ne'e governu tenke aproxima besik atu bele hatene atividade sira-ne'ebé kompañia GOTA halo.
Nia esplika, objetivu husi atividade inspesaun ne'e, atu hatudu governu ninia apoiu hodi bele besik liu servisu ho setór privádu sira, liuliu iha kompañia GOTA.
"Ha'u hanoin katak ohin ami haree prosesamentu sira-ne'e hotu prienxe rekizitu, estandarte ne'ebé tuir ita-nia lei permite no ita bele dehan prosesamentu, material kímiku ne'ebé kontein iha bee nia laran, hatudu duni katak, produtu ne'ebé sira prodús, prienxe kualidade ne'ebé OMS fó, tanba ne'e mak ita-nia konsumidór sira lalika dúvida atu bele konsumu produtu GOTA," Ministru Koordenadór Asuntu Ekonómiku (MKAE), Joaquim Amaral ko'alia iha sentru produsaun Bee GOTA, Ai-mutin, sesta (12/02).
Nia hatutan, Bee GOTA sai ona hanesan produtu nasionál ida-ne'ebé ninia prosesu produsaun liutiha ona rekizitu husi laboratóriu nian.
"Ne'ebé hanesan governu, estadu, no timoroan, kontente tebes haree progresu ida-ne'e no hein katak progresu indústria bee ne'ebé agora ita haree daudaun ba GOTA halo, bele inspira autór ekonómiku timoroan sira seluk, atubele haree tan poténsial sira seluk ne'ebé iha bele esplora, atu nune'e ita-nia setór privádu timoroan bele hetan fatin boot liután.
Nia hatete, governu liuhusi MKAE, sei apoia kondisaun kompañia ka indústria nasionál, nune'e gradualmente produtu sira bele hetan fatin boot liu iha merkadu nasionál, atu-bele hamenus produtu bee importadu sira.
Diretór kompañia Bee GOTA, Nilton Gusmăo konsidera, vizita husi MKAE, nu'udar konfiansa hodi fó motivasaun ba empreza Bee GOTA.
"Ami hanesan autór emprezáriu ne'ebé mai investe iha rai ida-ne'e klaru katak, vizita husi entidade importante husi MKAE ne'e, sei motiva liután empreza atubele kontinua halo nia atividade ekonómikas
ne'e iha rai laran", dehan Nilton.
Nia esplika, objetivu husi investimentu ba produsaun Bee GOTA ne'e kontribui ba dezenvolvimentu ekonómiku, loke kampu traballu atu hamenus dezempregu iha rai laran.
"Mezmu ke ohin seidauk emprega ema barak to'o rihun, maibé ita hahú daudaun ona. Ha'u hanoin investimentu iha ita-nia rain ne'e presiza iha barak liután autór nasionál nomós setór privadu internasioná ne'ebé futuru sei mai, tanba nasaun presiza investimentu", dehan nia.(*)
