Maibé iha situasaun Covid-19 ne'e rasik, la hapara atividade fábrika bee ne'ebé prodús husi Kompañia GOTA, hodi hariku liután kompañia na'in Nilton Gusmăo dos Santos.

Na'in ba Kompañia Bee-GOTA, Nilton Gusmăo dos Santos dehan, Covid-19 mosu, halo ema barak mak hasoru nia dezafiu oioin, maibé situasaun refere la difkulta prosesu fábrika Bee GOTA, tanba sira iha kontráriu uitoan husi indústria atividade ekonómika sira seluk.

"Tanba Covid-19 ne'e halo produtu balu mai husi li'ur komesa susar oituan, entaun ema-nia opsaun ne'e komesa hili ona produtu ne'ebé iha laran", dehan Nilton hanfoin simu vizita husi MKAE hodi haree direita prosesamentu produsaun Bee GOTA iha Ai-mutin, sesta (12/02).

Nia konsidera, parte pozitivu husi Covid-19 maka, fó espasu di'ak ba indústria rai laran folin di'ak liután, la'ós de'it Bee-GOTA, maibé produtu agrikula sira, produtu foun, indústria sira seluk mós iha diferénsia oituan, iha situasaun Covid-19 ho situasau normál.

Nia dehan, iha momentu situasaun normál, ema sei haluha oituan indústria sira-ne'ebé prodús iha rai-laran, maibé iha tempu Covid-19, ema komesa fó liu atensaun ba indústria rai-laran, tanba timoroan sira tenke prepara nia-aan iha nia uma-laran.

"Ne'ebé iha momentu ida-ne'e, ha'u hanoin deklara abertamente iha GOTA, ami iha aumentu oituan, la'os signifikante mais pelumenus ami nunka dezpede ema iha empreza, pelu kontráriu ami aumenta tán ema para depois bele loke nafatin kampu traballu ba ita-nia sosiedade," dehan Nilton.

Nia mós aproveita agradese ba komunidade sira ne'ebé fó ona konfiansa ba produtu GOTA, no husu katak produtu ne'e hanesan produtu rai-laran, atu ema bele konsumu nafatin produtu Bee GOTA, nia ho laran nakloke ba krítika ruma, atu mellora sira-nia kualidade.(*)