Kona-bá ba preokupasaun ne'e, PM Taur Matan Ruak rekoñese, katak durante ne'e, iha duni ministériu balu, mak ninia prosesu pagamentu saláriu tarde duni, no nia apela ba ministériu sira, nomós ba MF atu bele rezolve problema ne'e ho lalais.

 "Tanba ha'u lakohi ke funsionáriu sira lakon ou atraza sira-nia saláriu, ne'e importante. Tanba ne'e, ha'u hein katak liu-liu ministériu finansas parseria ho ministériu sira ne'ebé, ninia funsionáriu afetadu, sira bele servisu maka'as, para bele rezolve problema ida ne'e", dehan PM Taur Matan Ruak, iha Palásiu Prezidente, Aitarak-Laran, Díli, kinta (04/02).

 PM Taur hatete, saláriu ba funsionáriu sira tarde tanba, dala-ruma kada fulan, ministériu sira la konfirma ho sira-nia funsionáriu ne'ebé mak servisu iha fatin refere, hanesan balun ne'ebé sei moris ka balu bele mate ona, tanba idade avansadu, maibé dala-ruma la konfirma, tanba ne'e mak naturalmente saláriu atraza.

 "Tanba ministériu finansas mós labele selu arbiru, ke dala-ruma selu fali funsionáriu mate klamar ruma", dehan PM Taur.(*)