Embaxador Timor-Leste iha Austrália, Inês de Almeida, hateten, fatin ba timoroan sira servisu barak tebes iha Tasi Mane territóriu Austrália nian.

"To'os nain sira, dehan, se karik timoroan sira maka la servisu iha nee, sira nia to'os ne'e la konsege hetan aifuan strawberry ke barak hanesan agora, tanba timoroan sira nia servisu mak halo agora sira atu loke tan sira nia to'os,"Embaixadora Inês informa ba Tempotimor, tersa (12/1).

Embaixadora ne'e foin halo vizita ba fatin haat ne'ebé akumula traballadór Timor-oan 200 ital.

Embaixadora kontente no apresia ho prestasaun ne'ebé traballadór Timor-oan sira hatudu tanba servisu di'ak, servisu lalais.

"Sira (traballadór Timor-oan) sai hanesan aset boot ba to'os na'in sira. To'os na'in sira, dehan se karik timoroan sira maka la servisu iha ne'e, sir-nia to'os ne'e la konsege hetan aifuan strobery ke barak hanesan agora, tanba timoroan sira nia servisu mak halo agora sira atu loke tán sira-nia to-os. Porezemplu to'os ida uluk ektare 12 , agora tinan oin mai sira hakarak aumenta tán ektare 15 tanba timoroan sira-nia prestasaun," Embaixadora Inês esplika.

Embaixadora ne'e orgullu ho timoroan mai servisu iha Austrália, sira mak lori bandeira Timor-Leste hodi harii ita-nia nasan ho sira nia servisu ne'ebé maka'as liu.

Nia nota traballadór Timor-Oan Sira ho otas ladún bot maibé fóezemplu di'ak tebes, tanba balun sai tán supervisor iha empreza Australianu balun.

"Se tinan kotuk sira mak mai kuu ai-fuan ho di'ak halo servisu di'ak nune'e to'os na'in sira-nia grau ba supervisor, no ha'u hasoru malu ho sira, agora iha tan ida ke nia foin mai iha dezembru ke nia mak sai primeiru lugar ke ku'u aifuan lais liu, kuu aifuan morangos", Embaixadora ne'e fó apresiasaun.

Nune'e mós ema to'os na'in iha Austrália fó apresiasaun ba timoroan sira-ne'e. (*).