Diretór Jerál SEKoop Francisco Xavier, husu ba kompañia fornesedór sira tenke kontinua nafatin hala'o atividade fahe produtu lokál ba iha komunidade sira, tanba maske balu dehan produtu lokál hotu ona, maibé komunidade balu sira- nia produtu lokál sei iha.
"Data limite ba distribuisaun ba munisípiu 7 husi SEKoop ninian maka to'o loron 5 Fevereiru. Ida-ne'e hakarak ka lakohi ita tenke finaliza ona distribuisaun, ida-ne'e maka ha'u koalia”, Diretór Jerál SEKoop, ko'alia iha nia kna'ar-fatin Fundasaun Hanai Malu (FHM), Lanud Bairru-Pité, kinta (07/01).
Nia husu ba kompañia sira atu kontinua halo distribuisaun produtu lokál ba komunidade sira bazeia ba kontratu ne'ebé kontrata ona ho SEKoop.
"Hakarak ka lakohi, sira tenke responsábilidade ba sira-nia kontratu ne'ebá iha, meiu oinsá para ita-nia benefisiáriu hetan", dehan nia.
Bainhira husu kona-ba pagamentu ba kompañia fornesedór sira, nia dehan, asuntu ne'e responsábilidade estadu nian no dadaun ne'e sira prosesa ona hafoin halo pagamentu ba kompañia fornesedór sira.
"Tanba ne'e maka kompañia tenke esforsu para bele buka, para bele sosa produtu lokál sira-ne'e mai halo fali distribuisaun ba iha ita-nia komunidade sira-ne'e. Ida-ne'e maka ha'u orienta", tenik nia.
Nia hatutan, ba komunidade sira- ne'ebé hela ho distánsia dook husi suku ka villa, husu ba kompañia fornesedór sira atu nafatin transporta produtu ba to'o iha komunidade sira-nia hela fatin hodi halo distribuisaun.(*)