Ministru Turizmu, Komérsiu no Indústria José Lucas do Carmo da Silva, hateten governu fasilita, kompañia mak implementa halo distribusaun cesta bázika ai-han sira maibé parte KAK inklui AIFAESA sira mós tau matan hela.

"Governu rasik iha fatin balun haruka para, imi bele nota iha tinan foun ne'e no tinan kotuk mós hanesan, hahán ne'ebé mak fahe la tuir kritéria ita hapara," Ministru José Lucas, ko'alia iha Palásiu Governu Dili, Kuarta (6/1).

Governante ne'e akresenta, bainhira kompañia distribuidór sira mak fahe ai-haan balun dodok, fatin la mos governu direitamente hapara provizóriu hodi haruka kompañia hadi'a hafoin bele fahe fali.

Alende ne'e, José esklarese, governu la taka dalan ba sosiedade sivíl, povu sira atu akompanã no keixa bainhira la sastifaz ho inplementasaun cesta bázika ne'e.

"Ita nota, iha duni kontrolu para fó hatene fali mai governu hanesan reguladór, fasilitadór para atu hadi'a, ida- ne'e mak ita hotu-hotu nia responsáblidade," dehan José.

Antes ne'e, implentasaun cesta bázika ne'e ho objetivu atu rekupera ekonomia rai-laran maibé iha implementasaun mosu deskontenti husi povu balun tanba la sastifas ho ai-han sira-ne'ebé fahe hanesan produtu balun dodok inklui montante balun ne'ebé la to'o dolar $25 kada pesoál.(*)