“Ami hato'o ami nia agadesimentu ba sekretária estadu kooperativas neebé suporta ona kooperativa Paulo de Jesus liuhusi sensibilizasaun ho formasaun nomos suporta orsamentu ba atividade formasaun ida nee”, Prezidente Kooperativa Paulo de Jesus (KPJ), Ladislau Maria das Dores de Jesus hateten lia hirak nee iha munisípiu Likisá, Tersa (22/12).
Niar fiar katak ba oin, SEKoop sei apoiu nafatin kooperativa KPJ liuhusi parte formasaun kredível liu kona-ba lalaok kooperativa rasik, apoiu orsamentu hodi sustenta atividade kooperativa atu nunee kooperativa Paulo de Jesus hodi benefísia membru tomak bele sai di'ak liu tan iha futuru.
Nia informa, daudaun ne'e Kooperativa Paulo de Jesus (KPJ) rejístu ona membru ho totál iha ema nain 30 resin, ho sira nia kapitál finanseira hamutuk $4.000 (rihun haat) , maibé nia espera iha tinan 2021, sei aumenta liu tan tanba uma-lisan Beisilau-Baulelo iha membru família hamutuk ema 400 liu, no sira hotu sei involve iha laran.
Maria mós hatutan, servisu ne'ebé sei halao ba oin maka sei buka esforsu atu lori sira nia kooperativa ba halo rejísta iha Ministériu Justisa (MJ), maibé kona-ba kritériu seluk sira prienxe hotu ona, iha janeiru sei halo tan proposta ba SEKoop hodi husu apoiu formsaun.
“Nia tenke hatama osan, ema dehan simpanan pokok nee $100, depois simpanan wajib ne'e $10, no simpanan administrasi ne'e $10, totál nia atu sai membru, primeiru nia tenke hatama $120 hatama mai kooperativa hodi nune'e nia bele sai membru ba iha kooperativa”, nia esplika.(*)
