Kooperativa Wemook foin hari'i iha loron 14 fulan Maiu tinan 2020, baibain atividade ne'ebé sira halo maka produsaun aihan lokál hanesan kuda fore-mungu, batar, fore-kelin, ai-farina, ai-dila ho seluk tan.
Maski grupu ne'e membru sira foin atu kompleta ba tinan-hitu iha nia ezisténsia, maibé iha atividade lubuk mak membru sira hala’o ona hanesan prodúz ona kuantidade fore-mungu ho kg 900, no tonelada 300 ba produsaun batar.
Koordenadór Kooperativa Wemook, Ernesto Cardoso hateten, sira iha mehi atu loke tan lirás ba fatin hotu-hotu iha postu Tilomar nian atu bele forma mós grupu halo atividade kooperativa.
Nia dehan, kooperativa Wemook eziste ho mehi ida hakarak kontinua halo servisu hodi hamenus juventude sira husi dezempregu.
"Entaun, ha'u ho sira mai halo grupu ida ne'e, depois ha'u nia mehi atu loke tan, loke liras maske orsamentu natoon de'it, maibé ami sei loke liras ba sira seluk atu loke nafatin. Tanba ho razaun katak iha labele hein de'it governu", koordenadór kooperativa Wemook ba www.tempotimor.com, liuhusi telefónika, Kinta (03/12).
Nia dehan, ba oin, sira sei kontinua ho atividade kuda fore-mungu, batar ai-farina ho seluk tan atu bele ajuda governu hasa'e produsaun ai-han husi nível komunidade.
"Atividade ne'ebé ami halo hela ne'e maka ami prodúz fore-mungu 900 kg, batar kuaze toneladas 3, ho tan buat sira seluk hanesan ai-farina", nia dehan.
Entretantu, oras ne'e kooperativa Wemook eziste ho totál membru hamutuk na'in 24 kompostu husi mane 14, no feto 10 mak hala'o atividade kooperativa iha postu Tilomar, munisípiu Kovalima-Suai.(*)