Oscar Lima husu ne’e tanba tuir nia, durante ne'e lei sira ne'ebé governu halo, nia konteúdu ladun lori benefísiu ba emprezáriu sira.
Nia dehan, CCI-TL hanesan mahon ida ne'ebé halibur asosiasaun sira hotu atu bele fó lezitimidade ba CCI-TL hodi halo investimentu, maibé dala-ruma sira falla atu halo, tanba durante tinan tolu nia laran TL hasoru situasaun impasse polítika no enfrenta situasaun global Covid-19.
Oscar Lima hatutan, problema ne'ebé difikulta mós CCI-TL labele halo investimentu ida maka ligasaun ho lei sira ne'ebé governu halo, ladún lori benefísiu ba emprezáriu sira atu halo buat ruma.
“Pontus ba programa sira ne'ebé sai impotrante liu ne'e maka buat ne'ebé iha relasaun ho lei-lei sira ne'ebé mak to'o agora sei difikulta hela ami emprezáriu sira hotu”, CCI-TL, Oscar Lima hateten hafoin partisipa iha asembleia jerál anuál tinan 2020 nian iha salaun Katedrál Dili, sesta (27/11).
Nia dehan, asuntu ne'ebé kritiku liu maka parte governu ladun implementa kona-ba prátika kualifikasaun, ida ne'e kritikal no hamate emprezáriu sira, tanba karik millaun $1 (milliaun ida) de'it ba emprezáriu nasionais.
“Ema ida hanesan Oscar Lima ho kolegas sira seluk ne'ebé maka iha kaspidade boot teb-tebes labele halo, tanba lei ne'e limita tiha para nia labele halo, mais kapasidade ami nian bele halo to'o millaun $10”, nia hateten.
Tuir nia, emprezáriu sira mós iha kapasidade para atu halo, maibé dalan mak limita tiha sira hodi labele halo buat ruma, tanba ne'e maka nia husu atu dalan ne'e tenke sobu tiha.
“Sé lei ne'e halo para atu difikulta fila-fali, hamate fila-fali seitór privádu, diak liu muda tiha lei ne'e para bele fó benefísiu ba ita nia seitór privádu nasionál”, nia fó hanoin.
Nia promete sei kontinua buka dalan liuhusi halo aproximasaun ho governu liu-liu MKAE atu bele rona sira nia preokuparasaun atu iha tinan 2022 bainhira nia mandatu seidauk remata, bele halo netik buat ruma ne'ebé tuir nia kapasidade.
“Enkuantu ha'u seidauk tun iha 2022 husi CCI-TL, buat ne'ebé ha'u bele halo ba seitór privádu, ha'u sei halo”, nia promete. (*)
PUBLISIDADE