Print this page

SEKoop Kontrata tan Kompañia 20 atu Sosa no Distribui Sesta Bázika

By November 11, 2020 741
Sekretáriu Estadu Kooperativa (SEKoop), Elizário Ferreira koalia hela diretór kompañia sira timoroan nian, hodi ajuda governu sosa no distribuisaun produtu iha programa sexta bázika, molok halo asina nota entendimentu iha Akait, tersa (10/11). Sekretáriu Estadu Kooperativa (SEKoop), Elizário Ferreira koalia hela diretór kompañia sira timoroan nian, hodi ajuda governu sosa no distribuisaun produtu iha programa sexta bázika, molok halo asina nota entendimentu iha Akait, tersa (10/11). Foto Tempo Timor

Tempotimor (Díli)- Governu liuhusi Sekretária Estadu Kooperativa (SEKoop), kontrata tan kompañia 20 atu sosa produtu povu no halo distribuisaun fila-fali ba povu iha programa sesta bázika, hodi ajuda governu halo rekoperasaun ekonómika.

Sekretáriu Estadu Kooperativa, Elizário Ferreira hateten, ohin hasoru malu ona ho empreza sira atu mobiliza kompañia sira ne'ebé submete propósta iha SEKoop no prontu atu sai parseiru ho governu ajuda halo rekoperasaun ba ekonómia.

Nia esplika, programa sesta bázika iha faze tolu, sosa produtu, halo empakotamentu no halo distribuisaun, tanba ne'e, kompañia sira presiza liuhusi asina kontratu ida mak bele partisipa iha programa ne’e.

"Ohin 20-resin, no ba oin sei aumenta tan, tanba ami hanoin katak, kompañia ida-rua de'it sei labele kobre munisipiu neen", Elizário Ferreira hateten lia hirak ne’e hafoin asina nota entendimentu ho kompañia sira iha Akait, Tersa (10/11).

Nia dehan, kompañia sé de'it mak prontu atu koopera ho SEKoop hodi hala'o atividade rekoperasaun ekonómiku, SEKoop prontu atu koopera hodi asegura servisu ne'e ba oin ho di'ak liu tan.

Tanba liuhosi kompañia sira nia partisipasaun mak bele kontribui ba hadi'a ekonomia povu nian.

"Sei iha tan komapañia lubuk ida mak sei submete hela programa ne'e mai, no ha'u hanoin katak, ba oin ne'e bele sai di'ak liu tan, tanba sira prontu atu fasilita ho sira nia fasilidade tomak", nia tenik.

Nune’e mós diretór Komapañia Betulei, Oscar Lima hateten, importante tebtebes SEKoop atu fó oportunidade ba emprezáriu timoroan sira bele halo servisu ba sesta bázika.

Tuir nia, sesta bazika hanesan servisu todan, no presiza ema barak tenke servisu hamutuk hodi atinje objetivu governu nian atu distribui ba maun-alin, labarik sira no ita rasik hotu bele simu.

"Maibé buka kompañia ne'ebé barak hanesan ne'e hodi bele fahe tuir objetivu governu nian, tanba tempu ne'e badak demais, no espera katak ita sei ba sosa produtu lokál, no produtu lokál iha atu hotu-hotu bele uza", nia dehan.

Kompañia sira ne'ebé asina nota entendimentu ho SEKoop iha programa sesta bázika maka, Green Mota Ain, Unip. Lda, Pararel Unip. Lda, Star World, Jumar Unip. Lda, Haksolok, Aitula, Batulei no inklui seluk tan.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items