Sekretáriu Estadu Kooperativa (SEKoop), Elizário Ferreira hateten, enkontru ne'ebé nia halo ho benefisiariu sira kona-ba hetan fasilitasaun no konsdisiona husi SEKoop.
Nia informa, bazeia ba propósta ne'ebé tama antes, kuaze 70-resin ligadu ba atividade kooperativa nian, maibé depois avaliasaun husi ekipa komisaun, rezultadu hatudu 13 mak hetan asesu kondisionál husi SEKoop.

"Tanba ida ne'e kontribuisaun ne'ebé maka fó, parte ida husi fasilitasaun SEKoop nian, hodi kontribui ba dezenvolvimentu kooperativa nian", SEKoop, Elizário Ferreira hateten ba jornalísta sira hafoin asina nota entendimentu ho grupu kooperativa sira iha Akait, Tersa (10/11).

Nia esplika, kooperativa sira neebé maka asina ona, sei hetan fasilidade husi SEKoop liu-liu ba subvensaun públiku nian atu aselera servisu kooperativa iha nivel baze ligadu ho formasaun sira.
Kona-ba totál orsamentu ne'ebé SEKoop atribui ba kooperativa sira, nia dehan depende ba nesesidade ka pedidu husi grupu sira.

"Enprinsípiu, fasilidade sira hanesan edifísiu ninian, oinsá komputador ruma ka, maibé fó ho forma finansiamentu tanba sira rasik mak hola, bazeia ba nesesidade ne'ebé sira iha", nia dehan tan.

Nia hatutan, molok halo atribuisaun ba fasilidade ho finanseira sira, SEKoop mós hari'i uluk ona komisaun ida atu bele halo avaliasaun, monitorizasaun no auditoria ba subvensaun públika atu bele utiliza fasilidade ho diak hodi asegura sustentabilidade institusional no finanseira kooperativa nian.

Prezidente Kooperativa Kréditu Uniaun Builale, Ermelinda Monteiro da Cruz sente orgullu ho apoiu husi SEKoop, tanba bele fasilita nia nesesidade kooperativa.

"Ami hetan apoiu osan hamutuk $5.751. Ida ne'e hanesan uza sosa materiál ka fasilidade ba administrasaun, hanesan komputadór, meza ho kadeira ka armáriu tau dokumentu sira", Nia hatteen.

Nia hatutan, atividade sira maka foka liu ba rai no foti osan, atividade kréditu nian.

"Ami durante hala'o kooperativa ne’e haree liu ba rai no foti osan ho kréditu hanesan osan, sosa osan ami fó kréditu", nia hakotu.

Kooperativa Uniaun Builale, lokaliza iha aldeia Lialoos, suku Builale, postu administrativu Ossú, munisípiu Vikeke.

Entretantu, kooperativa 13 ne'ebé hetan tulun husi SEKoop mak hanesan, Federçăo Cooperativa de Crédito Hanai Malu (FCCHM), Grupu Hakbi'it Juventude Rural (HJR), Sagrado Coraçăo de Jesus (SCJ), Grupu Juventude Buka Hatene (JBH), Haburas Matadalan Kooperativa Uatulari (HMDK), Grupu Kooperativa Hadomi Produtu Lokál (KHPL), Crédito Uniăo Builale (CUB), We-mook, Cooperativa de Crédito Hadomi Jerasaun Futuru (HJF).

Capela Centro Pastorál Santa Maria do Rosário de Leo-Telo, Klíbur Uniaun de Crédito (KUC), Cooperativa de Crédito Ila-Luca, no Cooperativa de Crédito Deficientes Timor-Leste (CCDTL).