Hafoin distribuisaun, Xefe suku Sanirin Agosto Dato hateten, nia parte kontente tanba populasun iha suku ne’e bele simu duni Sesta Básika ne'ebé Governu halo.

"Nudar autoridade lokál ha'u sente kontente ho desizaun Governu ne’ebé halo distribuisaun produtu sesta básika. Ho ida ne'e bele responde nesesidade familia maske uituan maibé diak", Agosto hateten lia hirak ne’e hafoin akompaña Ministru Koordenadór Asuntu Ekonomiku (MAKE) Joaquim Amaral, hodi distribui Sesta Básika iha iha aldeia Palaka suku Sanirin Postu Administrativu Balibo Munisipiu Bobonaro.

Nia dehan, husi totál komunidade na’in 619, iha ema nain 300 mak sei simu uluk, no espera iha dia 6 (aban) mak foin bele entrega hotu sasan hirak ne'e hodi kompleta ba na’in 619.

Maski nune'e, nia mos husu Governu atu halo distribuisaun tenke halo preparasaun ho diak, tanba distribuisaun sesta básika iha suku Sanirin ladun máximu tanba preparasaun loron Ida deit.

Iha fatin hanesan MKAE Joaquim Amaral husu ba komunidade atu koopera hodi fó susesu ba programa sesta básika.

"Husu ba komunidade atu servisu hamutuk ho autoridade lokál nune'e ema hotu bele sai benefisiariu ba progrma cesta básika", Governante ne'e hateten.

Governante ne'e esplika, sesta básika ne'e ho objetivu atu fó apoiu ba komunidade, ba kada familia iha situasaun pandemia covid-19.

Joaquim hatutan, programa ne’e nu’udár oportunidade ba komunidade, tanba sira kuda Governu sosa hodi fahe fali ba komunidade liu husi produtu ne'ebé sira iha.

Sorin seluk, Ministru Komersiu Industria José Lucas do Carmo da Silva hateten, programa sesta básika ne'e nu’udar programa VIII Governu nian atu asiste sosiedade iha situasaun difisil.

Tuir Ministru ne'e nia hare katak, situasaun Covid laos fó ameasa ba Timor-Leste deit, maibé fó oportunidade ba agrikultór atu halo produsaun hodi faan liu husi programa sesta basika ne'ebé governu halo dadaun ne'e.

Governante ne'e kongratula Autoridade munisipiu Balibo no komunidade ne'ebé hatudu nia prontidaun hodi realiza atividade sesta básika ohin bele lao diak iha suku Sanirin.

Entretantu distribuisaun cesta básica iha suku Sanirin partisipa husi autoridade munisipál Bobonaro, autoridades lokál postu Balibo no membru governu iklui parseiru dezemvolvimentu sira.