Ho programa ne’e, Caritas konsege hari’i grupu ida ho membru hamutuk ema na’in 19 hodi forma grupu ida atu bele rai hamutuk osan, ho objetivu atu bainhira to’o tinan ida, membru sira bele fahe fali osan ne’ebé sira rai hamutuk.

“Fofoun ne’e, ami la hahú ho kooperativa, ami hahu ho grupu. Grupu ne’ebé hari’i husi Caritas, forma grupu depois rai osan, no empresta osan durante tinan ida, depois fahe”, Vise Prezidente Kooperativa Haburas Baguia, Paulino Dias Marrís hateten ba www.tempotimor.com iha postu administrativu Baguia, (23/10).

Nia hatutan, durante eziste tinan rua nia laran, sira deside fahe tiha osan ne’e, maibé membru balun lakohi no sira deside kontinua la’ó nafatin.

Iha tinan 2010, sira rona informasaun katak Sekretária Estadu Kooperativa (SEKoop) sei ba fó formasaun ba membru kooperativa ida naran Kohaba, nune’e sira ho voluntariamente ba tuir hodi rona mós informasaun.

“Ami mai tuir, entaun ami iha ne’e rona no hetan informasaun kona-ba kooperativa, ami sente ba di’ak. Entaun, ha’u ho kolega sira kombina malu, ami fó hanoin ba malu katak, duké ita ho grupu de’it, tinan ida osan ne’ebé iha ita fahe tiha, depois iha forma fali, entaun di’ak liu ita hari’i de’it ona kooperativa ida”, nia dehan.

Nia hateten, maski ho rekursu ne’ebé limitadu, ikus mai sira konsege hari’i kooperativa ho naran Kooperativa Haburas Baguia, ne’ebé hahú ho membru na’in 19 ho kapitál finanseira hamutuk $3,950.

Maske ho esperiénsia ne’ebé mukit iha área kooperativa, maibé liuhosi esforsu, sira konsege hetan tulun husi pontu fokál SEKoop nian husi Baukau liuhosi kada semana halo sira konsulta, sempre husu hanoin ba sira oinsá mak bele sura osan no organiza kooperativa ida.

Depois ho ezisténsia kooperativa ida ne’e ikus mai ema hatene, no membru sira rasik bele loke servisu mesak no la presiza ba iha sidade.

Tuir nia, postu administrativu Baguia lokaliza liu iha área rurál, entaun ida ne’e sai hanesan oportunidade di’ak ida ba sira, tanba liuhosi kooperativa membru sira bele fó hanoin ba komunidade no joven sira, tanba dala-barak ema dehan iha foho servisu laiha.