Tempotimor (Díli)- Prezidente Kooperativa Kréditu Uniaun (KKU) Naunil, Luis Fernandes informa, Governu liuhosi Sekretaria Estadu Kooperativa (SEKoop), fó ona konfiansa ba Kooperativa Kréditu Uniaun (KKU) Naunil, atu bele sai hanesan sentru ida, ba kooperativa hotu-hotu ne'ebé eziste, iha Postu-Administrativu Iliomar, munisípiu Lautem.
"Kooperativa Naunil nia hanoin ba futuru mak, agora dadaun sua-exelénsia Sekretáriu Estadu Kooperativa fó ona fiar atu sai sentru ba kooperativa hotu-hotu, iha postu administrativu Iliomar", hatete Prezidente Kooperativa Kréditu Uniaun (KKU) Naunil, Luis Fernandes ba jornalísta sira, iha Salaun Administrasaun Postu-Administrativu Iliomar, munsípiu Lautem, kinta (22/10).
Nia hatutan, Naunil prontu ona no hein de'it, atu lori ba rejista iha notariadu, atu bele hetan legalidade no dadaun ne'e, sira prontu ona, atu sai sentru ba kooperativa, karik iha kooperativa hosi suku sira, hakarak atu afilia ba sira, iha Kooperativa Naunil.
“Ami hein katak ho ajudus ou kapasitasaun ne'ebé sua-exelénsia Sekretáriu Estadu fó ona, ida ne'e bele haforsa ami, atu nune'e ami-nia atividade kooperativas ne'e bele ba oin", dehan nia.
Tanba ho problema kapasitasaun, SEKoop mos haruka tan ekipa ida, hodi ba fó formasaun ba sira-nia membru nomos ba grupu kooperativa sira ne'ebé eziste, iha Postu-Administrativu Iliomar, bele hasa'e no hadi'a sira-nia jestaun, iha sira-nia kooperativa.
