Ho komemorasaun loron importante ne'e, Grupu Mulheres Parlamentáres TimorLests (GMPTL) deside komemora iha munisípiu Likísa, iha suku Dato no Loidaha.
Sekretária Estadu Kooperativa (SEKoop), Elizário Ferreira ne'ebé partisipa mós iha eventu nee hatete, iha vída kooperativa, ema bolu dezempeñu di'ak ne'e, feto.
Durante tinan 20, nia moris hanesan kooperativista sira, nune'e tuir ninia haree, negósiu di'ak liu, mak feto sira, empresta bele fó osan fila-fali di'ak liu, feto, no feto sira sempre halo konsulta kooperativa.
"Ida ne'e, atu hatete saida, katak dezempeñu feto nian ne'e, di'ak liu kompara ho mane iha vida kooperativa nian", hatete SEKoop Elizário Ferreira iha ninia diskursu hodi komemora loron internasionál feto iha munisípiu Likísa, suku Dato no Loidaha, kinta (15/10).
Governante ne'e haktuir, kooperativa 214 iha Timor, liu-liu ba kréditu, dirijente feto sira nia sede maiória uma ho andar de'it, maibé dirijente mane sira nia sede hakdasak de'it.
Nia hatutan, dadaun ne'e profile kona-ba membru kooperativa sira mós, la dook malu. Feto liu de'it pursentu ida husi mane, ba partisipasaun feto iha kooperativa.
"Ema hamutuk 47 mill membrus kooperativa iha Timor, 29 mill ne'e feto. Ne'e atu hatudu dezempeñu feto nian di'ak liu kompara ho mane", dehan Elizário.
Tuir nia, mane sira bainhira empresta osan halo atividade negósiu, iha mós game barak ne'ebé sira halo, tanba ida ne'e, maka dezempeñu finanseiru mane nian, ladun di'ak.
Iha fatin hanesan, Vise Prezidente Parlamentu Nasionál, Maria Angelina Sarmento hateten, globalmente, loron internasional feto rural, hahú selebra iha 15 Outubru 2008, depois asembleia jerál Nasoens Unidas nian ho rezolusaun númeru 62/138 iha loron 18 fulan Dezembru 2007.
Nia dehan, rezolusaun ne'e hamosu hodi ezije komunidade internasional atu rekoñese papél krítiku no kontribuisaun husi feto rurál hodi realsa dezenvolvimentu agrikula no rural.
"Hadi'a seguransa ai-han no halakon kiak rurál", dehan nia. (*)