Nia dehan, iha kontratu ne'e, tekniku sira komesa halo ona prosesu ba produsaun karosa ne'ebé atu distribui ba negosiante sira.

"Agora, karosa ne'e iha hela produsaun, ami SEKoop rasik servisu hamutuk Dom Bosco oinsá mak atu bele prodúz karosa ida ne'ebé di'ak ho kualidade, bele la'o iha kapitál Díli", informa SEKoop, Elizário Ferreira iha nia kna'ar fatin Akait, kuarta (07/10).

Elizário hatutan, dadaun ne'e tékniku sira sei halo hela produsaun, tanba dezeñu sira haree ona, no 50% iha ona parte produsaun, maibé sei haree uluk ninia modelu ne'ebé teknika sira halo, kuandu prontu ona, SEKoop sei halo aprovasaun hodi distribui ba negosiante ambulante sira.

"Naran negósiu ambulante, sira labele fa'an de'it iha fatin, sira tenke movel ba mai, atu nune'e bele asegura nafatin Díli sai sidade ida ho ambiente moos ba kapitál nasaun TL", dehan nia.

Entretantu, distribuisaun karosa ba negosiante sira ne'e, SEKoop sei servisu hamutuk ho kooperativa sira hodi halo distribuisaun.

Fó hanoin fali katak, antes ne'e, SEKoop hala'o ona enkontru ho negosiante ambulante sira hamutuk ema nain 400-resin, maibé bazeia ba informasaun ne'ebé sira simu husi kooperativa rua iha Díli, rejísta ona ema 100-resin, maibé sei falta ema 300-resin mak seidauk rejísta.

"Tanba iha momentu sira halo reuniaun, ema kuaje 400-resin entaun signifika balu seidauk no sei fó prioridade ba sira ne'ebé rejísta uluk ona", nia hakotu.

Liu tan, SEKoop Elizário Pereira katak, apoiu karosa ne'e iha ona ajenda SEKoop nian katak, iha 2021, karosa ba negosiante ambulante sira distribui ona ba sira.

"2021 programa ne'e tama ona iha planu para sira bele la'ó ba oin. tanba bazeia ba tékniku Dom Bosco sira ne'ebé dadaun ne'e sei halo hela prosesu produsaun ba karosa sira," katak Elizário.

Governante ne'e mós dehan, karosa foun ne'ebé governu sei diatribui ne'e, kompleitu ho fasilidade hanesan eletrisidade.

"Kareta ida modelu di'ak kompleta ho ahi (eletrisidade) para kalan nia bele naroman di'ak. Maibé ida ne'e la'ós buat fásil, tenke lori tempu atu bele halo konstrusaun ba karosa ida," katak nia.

Elizário mós dehan, kritériu atu hetan karosa ida, negosiante ida tenke sai uluk membru iha kooperativa, nia tenke iha kapitál investimentu ka depózitu iha kooperativa, nune'e bainhira karosa ne'ebé nia simu kondisaun aat, nia tenke halo manutensaun husi osan ne'ebé tau ona iha kooperativa," nia afirma.

"Negosiante sira ne'ebé sai membru ba kooperativa ne'e, másimu liu ho dolar $65, bele sai ho dolar $35, bele sai ho dolar $115," Elizário informa.

Nia akresenta katak, bainhira negosiante sira-nia kapitál menus, bele empresta fali osan husi kooperativa hodi halo negósiu, depois nia bele devolve bazeia ba rendimentu ne'ebé negosiante ne'e hetan.

"Sé simu de'it karosa, derepente lia ruma kona mak nia gasta tiha osan ida nia iha ne'e, entaun karosa mós toba ona, na'in mós labele negósiu ona. Tanba ne'e maka SEKoop nia objetivu atu kria kondisaun ida sustentável no iha estabilidade ekonómika ba negosiante ambulante sira bele hala'o negósiu ho di'ak," dehan nia.(*)