Iha pose ne'e, nia aprezenta mos programa lubuk ida, kona-bá dezenvolvimentu kooperativa nian, inklui hato'o mos promesa katak, durante loron atus ida (100), sura husi loron simu pose, nia sei harii kooperativa foun hamutuk lima (5), iha de'it loron atus ida nia laran.
Maske seidauk to'o loron 26 fulan Outubru tinan 2020, hodi kompleta ba loron atus ida, maibé nia konsege harii ona, kooperativa foun hamutuk 12, ne'ebé mak eziste ona, iha Timor-Leste (TL).
"Di'ak, kooperativa lima ne'e, ha'u hanoin sei halo 100 dias iha 26 Outubru, para atu kompleta 100 dias, mais agora iha ona kooperativa 12 maka harii ona iha Timor. Ida ne'e foun", hatete Sekretáriu Estadu Kooperativa (SEKoop), Elizário Ferreira ba www.tempotimor.com, iha nia servisu Akait, segunda ohin (05/10).
Elizário Ferreira hateten, alende nee, sira mos organiza ona, mikro empreza kiik sira, inklui negosiante ambulante sira ne'ebé organizadu no sei kria mos kondisaun ba sira, sei servisu hamutuk ho MAE, atu asegura negosiante ambulante sira nia negósiu ida ho dignu no asegura Díli sai kapitál ida ne'ebé ho ambiente moos no saudável.
Negosiante sira mos partisipa iha kontribuisaun ba asegura meiu ambiente no sira nia ekipamentu ida ba halo negósiu moos, negósiu ida ne'ebé dignu, atu nune'e bele kontribui ba ita nia rai ida ne'ebé ekonomikamente saudável no sustentável.
"Kuandu ha'u seidauk mai iha kooperativa, iha kooperativa kréditu ne'e hamutuk 87, maibé iha 40 resin mak funsiona. Husi 40 ne'e, funsiona di'ak liu mak 16", informa nia.
Nia dehan, husi kooperativa kréditu hamutuk 16, iha tempu ne'ebá sira akomoda ona fundus milloens $.5 resin, no agora dadaun, iha ona kooperativa kréditu hamutuk 50, no kooperativa produtivu 25, totál hamutuk kooperativa 75.
Entretantu, kooperativa kréditu akomoda ona fundus hamutuk Dollar Amerikanu milloens $.8.8 dolláres, kooperativa naun-produtivu akomoda ona Dollar Amerikanu milloens $.3.8.
"Ida ne'e, atu hatudu katak, orsamentu ne'e, orsamentu kooperativa nian ne'ebé mai husi membru individuál hamutuk rihun 47 iha Timor", dehan Elizário.
