Husi total $.3.765 sei aloka ba Saláriu no Vensimentu tokon 1.336, Bens no Servisu tokon $. 1.746, Transferénsia Públika rihun $.486, Kapitál Menór $.195.

Tuir Sekretáriu Estadu Formasaun Profisionál no Empregu, Alarico do Rosário deklara, sira nia parte, iha ona planu atu sosa ekipamentu, hanesan komputadór ba funsionáriu SEFOPE.

"Iha proposta ne'e, ami hatete ba ita boot sira, los duni, durante ne'e komputadór ne'ebé ami uza komesa husi UNTAED nia tempu to'o mai agora, ami nia funsionáriu sira, ema nain tolu ou ema nain haat kaer ka uza hamutuk komputadór ida," esplika SEFOPE, Alarico do Rosário, iha Plenáriu PN, Segunda (5/10).

Durante diskusaun ne'e, Alarico relata mos problema seluk kona-bá menus transportes, tanbá to'o agora, SEFOPE foin iha kareta tolu, ne'ebé uluk sosa iha 2014.

"Kareta sira ne'ebé SEFOPE iha, balun apoiu husi ILO, balun apoiu husi Governu, maibé kareta sira ne'e, aat hotu ona, kareta hamutuk 25 maibé hela de'it 15 mak di'ak," dehan nia.

Nia hatuta, infelizmente dadauk ne'e, Diretór Nasionál hamutuk nain lima, mak seidauk asesu transporte inklui Diretór sira iha Munisípiu 12, ne'ebé sira seidauk iha transporte.

"Tanba ne'e ami iha ne'e, ita hotu tau hanoin ida ba rai ida ne'e, ba povu ida ne'e, atu oinsá para ita tulun malu, deputadu sira tulun Governu nomos Governu tulun deputadu sira, oinsá ita lori timor ba oin," dehan nia.

Molok ne'e, deputadu bankada Fretilin, Joaquim dos Santos afirma, husi bankada Fretilin prontu fó apoiu, maibé importante SEFOPE tenke lansa prosesu sira, tuir kurtu prazu ne'ebé determinadu ne'e.

Iha fatin hanesan, deputadu bankada PD, Adriano do Nascimento husu ba SEFOPE, tenke implementa sasan hirak ne'e ho dignu, maibé labele hanesn fali ambisiozu.

Tuir nia, tanbá dadaun ne'e, hela de'it fulan rua, tanba ne'e, PD konsidera katak, ida ne'e laiha tempu ona, atu SEFOPE atu lansa programa ida ne'e hotu, iha tempu badak.