Tempotimor (Díli) - Sekretária Estadu Kooperativa (SEKoop) iha komitmentu polítika boot atu tau atensaun ba negosiante ambulante sira ne'ebé durante halo atividade negósiu iha dalan ninin atu fasilita no kria kondisaun ba sira hodi faan sasán ho di'ak no seguru.
Ba polítika ne'e, antes ne'e SEKoop rasik mós hala'o ona enkontru ho negosiante ambulante sira hamutuk ema na'in 400, maibé sira ne'ebé foin rejísta hodi hakarak hola parte iha kooperativa foin mak ema na'in 50.
Maski nune'e, atu hetan tulun husi SEKoop, kritériu ida maka negosiante ambulante sira tenke rejísta hodi hola parte nu'udár kooperativa.
“Iha totál 400 negosiante ambulante mak rejístadu no foin maka 50-itál hola parte iha kooperativa. Entaun, sira seluk ne'e hola parte hotu para bele haree kria kondisaun ba sira," hatete Sekretáriu Estadu Kooperativas
(SEKoop), Elizário Ferreira, iha eis Heliport, Bairru Pité, Sesta (25/09).
Governante ne'e hatutan, ekipa SEKoop nian ko'alia no organiza ona negosiante ambulante sira tanba ne'e ema la duni ona sira maibé, ba sira ne'ebé hakarak atu faan permanente, diak liu ba iha faan iha merkadu.
“Organiza hela sira atu hola parte iha kooperativa hanesan ami nia konkordánsia ne'ebé natoon hetan hamutuk iha ne'e, no ba oin sira hola parte iha kooperativa hodi bele asesu ba kapitál, asesu mós ekipamentu ruma ne'ebé sira presiza atu bele asegura ba oin, dehan nia.
Elizário husu ba negosiante sira atu fa'an sira nia sasán tuir ema ambulante, hodi nune'e ema labele duni tan sira, no husu atu fa'an sasán ho konxiénsia. (*)