"Razaun hasai kada benefisiáriu sira nia fotografia, mak ne'e, hahú Janeiru 2020, ita ko'a sira-nia osan $.30. Entaun ekipa tuun ba munisípiu sira, maka husu ba benefisiáriu hakbesik aan mai hasai fotográfia no hetan kartaun," dehan Gil da Costa "Oan Soru" ija nia knaar fatin, Kaikoli, Sesta (25/9).
Kalendáriu ne'ebé ekipa operadór husi Diresaun Nasionál Pensaun no Subvensaun (DNPS) sira sei tun ba munisípu to'o postu no suku sira komesa loron (28/9) hodi foti benefisiáriu sira-nia forográfia inklui halo mós kartaun ba sira.
Nia dehan, hasai fotografia ne'e, la'ós ema hotu-hotu, maibé ba de'it sira ne'ebé kada fulan simu pensaun ba forma hela iha banku mak bele marka prezensa hodi hetan kartaun, maibé sira ne'ebé maka hasai tiha ona iha Díli, la presiza ona marka prezensa.
"Liu husi kartaun ne'ebé halo ona, bainhira mate, ninia oan sira ka ninia família bele lori kartaun ida ne'e ba aprezenta iha baze dadus hodi hatene ninia aman ka ninia inan nia osan durante ko'a ne'e iha ne'ebé," nia dehan.
Nia afirma, bainhira ko'a ona sira-nia osan, direitu ba ema ne'e no ba futuru mós tenke husik hela ba nia jerasaun sira, tanba ne'e ho kartaun ne'ebé iha, bele sai hanesan identidade ida hodi rekoñese katak aban-bainrua aman ka inan ida ne'e, oan sira hatene hela katak evidénsia ida ne'e mak sei lori mai buka tuir.
Ekipa ne'ebé sei tuun ba halo atendimentu kompostu husi ekipa haat ne'ebé sei fahe ba rejiaun sira. Ekipa primeiru atende munisípiu Lautem, Baukau, Vikeke ho Manatutu. Ekipa daruak sei atende munisípiu Aileu, Ainaro, Kovalima ho Manufahi. Ekipa datolu sei atende munisípiu Bobonaro, Likísa ho Ermera no ekipa ikus liu mak sei atende RAEOA, Ataúro, maibé iha Díli laran postu hotu-hotu la temi iha ne'e, sira hotu-hotu sei mai iha ne'e.
“Kada ekipa kompostu husi ema na'in 4, kada loron ema ida atende ema na'in 50, signifika ema na'in 4 loron ida sei atende ema na'in 200 tuir númeru benefisiáriu ne'ebé iha kada munisípiu," informa nia.
Entretantu, sosializasaun Sekretária Estadu Asuntu Kombatentes ba Libertasaun Nasionál (SEAKLN) nian foin mak hala'o iha postu administrativu 17 kompostu munisípiu Aileu, Ainaro, Bobonaro, ho Likísa, maibé munisípiu sia ho postu 49 no benefisiáriu na'in rihun 20.274 mak seidauk hasai fotografia.(*)