GPM Propoin Adisional Tokon $5 ba Programa Prioridade 4

Xefe Gabinete Primeiru Ministru Azevedo Marçal koalia hela ho jornalista hafoin finaliza aprezentasaun prolosta adisional ba Komite Revizaun Orsamentu Politiku (KROP) iha Ministeriu Finansa (MF) Aitarak Laran, tersa (22/9). Xefe Gabinete Primeiru Ministru Azevedo Marçal koalia hela ho jornalista hafoin finaliza aprezentasaun prolosta adisional ba Komite Revizaun Orsamentu Politiku (KROP) iha Ministeriu Finansa (MF) Aitarak Laran, tersa (22/9). Foto Tempo Timor

Tempotimor (Dili)-Gabinete Primeiru Ministru (GPM) liu husi reuniaun Komite Revizaun Orsamentu Politiku (KROP) daruak ba proposta Orsamentu Jeral Estadu (OJE) 2021, propoin osan adisional ho valor tokon $5 hodi sustenta ba programa haat ne'ebé sai nu’udar prioridade ba GPM iha tinan oin.

Programa haat ne’e mak: asegura reforma estratejikas estadu nian; kontinua fó apoiu ba sosidade sivil sira; Unidade Planeamentu Monitorizasaun Avaliasaun (UPMA); no programa boa governasaun ne'ebe  nudar papél importante husi Primeiru Ministru Taur Matan Ruak.

Xefe Gabinete Primeiru Ministru, Azevedo Marçal dehan, sira-nia parte husu atu mantein osan tokon montante $11 ne’ebé iha OJE 2019 aloka ba GPM.

Nia hatete, husi proposta tetu OJE 2021 ne'ebé mak fó ba Gabinete PM ne'e tokon $7.9, maibé ida ne'e fahe ba ajensia autonomu rua hanesan TIC no CNC, nune’e Gabinte PM hetan de’it tokon $6.

Tan ne’e, nia hatutan, parte GPM husu tan adisional millaun $5 atu kompleta ba tokon $11 hodi bele responde ba programa prioridade ne’ebé iha.

" Ita aprezenta ba KROP,  ita husu Adisional $5 miloens, mais ida ne'e ita bele dehan laos adisional tanba ida ne'e osan ida ne'ebé ita presiza duni, iha OJE 2019 ita hetan tokon $11, tanba ne'e ita husu par mantein," dehan Azevedo iha edifisiu Ministeriu Finansas (MF), Aitarak-laran, Segunda (22/09).

Nia hatutan, nia parte fó ona justifikasaun detallu ba komite revizaun orsamentu politika, atu oinsa mak mantein  alokasaun orsamentu normal tokon $11 ba GPM.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.