Negosiante Dalan Ibun Triste, Membru Governu ‘La Liga’ Katupa no Ikan

Fatin fa'an Katupa ho ikan hodi kalsu kabun iha Obratu Manatuto, Sabado (19/9) Fatin fa'an Katupa ho ikan hodi kalsu kabun iha Obratu Manatuto, Sabado (19/9) Foto Tempo Timor

Tempotimor (Manatuto)-Negosiante sira ne’ebé durante ne’e fa’an katupa no ikan iha dalan ibun Obrato, Munisipiu Manatuto sente triste tanba durante ne’e laiha membru governu ida mak para netik iha sira-nia fatin hodi sosa netik produtu ne’ebé sira fa’an.

Durante ne’e, negosiante sira daan katupa no tunu ikan hodi hein ema hirak ne’ebé hala’o viajen ba parte leste, hanesan Munisipiu Baukau, Vikeke, Lautem, no Manufahi, tuun hodi ense netik kabun.

Pasajeiru barak mak tuun hodi ense netik kabun, maibé sira triste tanba dala-barak membru governu sira hala’o viajen ba-mai, maibé nunka para iha sira-nia fatin hodi sosa netik katupa no ikan ne’ebé sira fa’an.

"Ema boot sira ne'e la mai sosa ida, sira ho karreta halai liu de'it, nunka para sosa netik ami-nia sasan mós laiha, ema sira motor ho karreta privádu de'it mak mai sosa ikan ho katupa iha ne'e," dehan negosiante ida, Terezinha de Carvalho ba jornalista www.tempotimor.com iha baraka Obrato, Manatutu, Sabadu (19/09).

Nia hatete, produtu ne'ebé sira fa'an maka katupa ho de'it ikan inklui sasan sira seluk hanesan pop mie, Bee-Aqua, no kada loron bele hetan $7 no dala-ruma bele hetan to’o $10.

"Osan ne'ebé hetan uza ba selu oan sira nia eskola, depois balu uza ba presiza uma-laran nian hanesan sosa foos," dehan nia.

Nia hatutan, bainhira akontese tasi-boot, sira labele hetan ikan no sosa fali husi Vemasse no Behau (Ilimanu) nian.

"Depois lori mai fa'an fali iha ne'e, i dala-ruma ami sosa balde ida sira fa'an ho dollar $10 no balun to'o dollar 15,” hatete nia.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.