Print this page

Kooperativa Kovalima Husu Ajuda ba SEKoop

By September 18, 2020 1129
Sekretáriu estadu kooperativa Elizário Ferreira hasoru malu ho grupu agrikultura sira iha Aldeia Sadahur Suku Maudemu postu admistrativu Tiliomar Munisípiu Covalima, Kinta (17/9). Sekretáriu estadu kooperativa Elizário Ferreira hasoru malu ho grupu agrikultura sira iha Aldeia Sadahur Suku Maudemu postu admistrativu Tiliomar Munisípiu Covalima, Kinta (17/9). Foto Tempo Timor

Tempotimor (Dili) - Grupu agrikultór ne'ebé sei nakfilak ba Kooperativa Munisipiu Covalima sente kontente no husu tulun ba Governu liuhusi Sekretáriu Estadu Kooperativa, atu bele apoia sira-nia negósiu.


Sentimentu kontenti ne'e hato'o husi kooperativa agrikultura husi Grupu Feto Hametin Foho Tetuk no Hae Oan, tanba foin primeira-vés governante ida marka prezensa iha sira nia leet hodi rona halerik diretamente.

Nune'e, husi kooperativa ne'ebé Sekretáriu Estadu halo vizita husu tulun ba SEKoop, liuliu relasiona ho kapasitasaun inklui sede grupu no fasilidade seluk.

Hanesan hato'o husi Grupu Feto Hametin Foho Tetuk ne'ebé harii iha Aldea Sadahur, Suku Maudemu, Postu Admistrativu Tiliomar.

Grupu Feto ne'ebe hari'i Kooperativa ne'e husu ba Sekretáriu Estadu atu ajuda tulun sede grupu no fasilidade seluk hanesan printer.

"Sujere de'it ba governu atu tau netik matan mai grupu feto iha área rurál ne'ebé presiza tebes sede grupu ho mákina printer," dehan Xefe Hametin Foho Tetuk, Neza Mendonça Amaral, iha Aldeia Sadahur, Suku Maudemu, Postu Administrativu Tiliomar, Kovalima, Kinta (17/9).

Koperativa Hametin Foho Tetuk rasik hamutuk membru feto 17, ne'ebé sub husi assosiasaun foho tetuk, kria produsaun fore metan.

Iha fatin ketak, Sekretaria Hae Oan, Crispin Gonzaga, sente kontente no orgullu ho prezensa Sekretáriu Estadu Kooperativa, Elizário Ferreira iha sira-nia fatin tanba durante tinan 10 resin ona laiha governante ida mak tau matan ba sira.

"Ohin loron Sekretáriu Estadu mai to'o iha ne'e, ami sente kontente tebes," dehan nia, iha Aldeia Beilaku, Suku Raimea, Postu Administrativu Zumalai, Kovalima, Kinta (17/9).

Koperativa Hae Oan rasik iha difikuldade atu asesu merkadu, durante ne'e produtu hanesan fós kada membru husi grupu sempre produs tonelada 4 ka 5 husi total membru 21.

"Ami nia difikuldade mak liuliu merkadu nian, tanba hanesan grupu agrikultur produs produtu maibe menus iha korrente merkadu," dehan Crispin.

Entertantu, Sekretariu Estadu Kooperativa, Elizário Ferreira hateten, prontu apoiu sede no fasilidade hanesan printer ba grupu sira, importante mak oinsá kada grupu bele kontinua produs produtu ne'ebé durante ne'e iha no sekretariu estadu rasik sei fasilita atu loke merkadu fronteira ba Suai-oan sira, nune'e produtu bele faan iha fronteira. (*)  

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items