Diskusaun ne’e halao hafoin Governu aprezenta ba PN iha Tersa (15/9). Governu husu atu orsamentu ne’e diskute ho karakter urjensia tanba iha fulan oin governu sei aprezentaa fali OJE 2021 nian.

Nune’e, hafoin simu proposta OJE 2020, Prezidente PN baixa kedas ba Komisaun C PN, iha loron ida tuir mai, hodi prepara pareser ba diskusaun.

Entretantu, Primeiru Ministru (PM), Taur Matan Ruak hateten, OJE tinan fiskal 2020 balun selu divida no balun lae.

Nia dehan, OJE ba 2020 sei diskute de'it ba fulan-Novembru ho Dezembru nian.

"Orsamentu Jerál Estadu (OJE) 2020 balun selu dividas no balu la'os, tanba orsamentu se ita boot sira haree orsamentu 2020 ne'e, loloos karik orsamentu ne'ebé ita ezekuta tiha ona, tanba janeiru to'o agora duadesimal, kuandu tempu ita deskuti fulan rua November ho Dezembru nian de'it", tenik PM Taur iha Palásiu Prezidensial, Bairru-Pite, Kinta (17/9).

Nune’e, OJE 2020 mós atu selu projetu 143, liuliu ba projetu hirak ne’ebé prienxe rekizitu hodi bele hetan pagamentu.

“Ida ne'ebé ninia dezenvolvimentu diak hotu aprezenta, ita selu. Ida ne'ebé lae, naturalmente ita labele selu, tanba tuir persentajen ne'ebé sira halo hotu nian," dehan PM Taur.

Kona-ba informasaun ne'ebé espala katak, Banku Federal Amerika sei la halo transferensia osan mai Timor-Leste, parte governu sidauk simu karta ruma.

"Hau sidauk simu surat ida, tanba Parlamentu Nasionál aprova orsamentu laiha problema, tanba daudaun ne'e mezmu duadesimal osan laiha ita bele la'o", tenik nia. (*)