Reprezentante Juventude suku Metiaut, Ângelo Janeiro Soares hatete, durante ne'e, sira iha ona grupu rasik, iha suku no hala'o ona atividade lubuk ida ho kumunidade sira, nomos iha planu, atu kuda ai-oan, maibé sira haree katak, prosesu ne'e la fasil.
"Iha ami nia planu ba oin, hakarak halo eko-turízmu, maibé ami problema mak fundus, tanba ne'e, ami husu ba Sua Exelénsia, atu la presiza fó osan, maibé apoiu de'it materiál, hanesan ai-kabelak sira, atu ami bele implementa planu ne'ebé ami iha", dehan Ângelo Janeiro Soares, durante halo diskusaun ho SEKoop, iha sede suku Metiaut, Sexta (11/09).
Nia hatutan, alende enfrenta problema finanseira atu harii sira nia planu, sira mos iha limitasaun koñesimentu kona-bá kooperativa, nune'e nia husu ba SEKoop, atu fó apoiu formasaun no ai-kabelak hodi promove eko-turízmu, iha suku Metiaut.
Hatán ba preokupasaun ne'e, Sekretáriu Estadu Kooperativa (SEKoop), Elizário Ferreira hatete, SEKoop prontu fó apoiu ba juventude ne'ebé iha inisiativa di'ak, hodi dezenvolve sira nia kooperativa liuhosi apoiu materiál, maibé mós sei apoiu formasaun ba membru sira, hodi dezenvolve aan.
"Ami prontu apoiu ita boot sira, importante mak, imi tenke halo planu sustentábilidade, aprezenta mai ha'u depois rejista", dehan nia.
Nia hatutan, formasaun ne'ebé sei fó ba membru kooperativa sira, foka liu ba área jestaun nian, oinsá eduka membru sira, atu jere rekursu ne'ebé sira iha, hodi dezenvolve sira-nia kooperativa rasik.
"Maibé, eko-turízmu tenke sustentável, sobrevive, labele ohin halo, aban fahe malu, maibé tenke kria jestaun ida di'ak hodi dezenvolve nafatin ba oin", hatete nia.