Governante ne'e hateten, orsamentu ba tinan 2021 sei prevé ba kafé sempre iha, tanba iha planu balun ne'ebé ministériu anteriór hala'o ona.
Nune'e sei hamutuk ho ekipa téknika atu kontinua la'o bá oin liután, tanba kafé ne'e rendimentu ne'ebé kontribui bá estadu hafoin mina-rai.
“Ministériu Agrikultura sempre fó atensaun atu hadi'a kafé sira ne’e sanak tuan ona, nune'e bele hadi’a di’ak fó fuan kapás liután ne'e mak daudaun ekipa téknika diresaun nasionál planta no kafé halo daudaun la'o hela,” dehan Ministru Pedro, iha Salaun Novu Turizmu, Kinta(27/08).
Governu tau intensaun atu hadi'a kafé maibé sei haree mós produtu sira seluk hanesan vanila iha Fatubesi- Ermera no fatin balun tan iha suku Lemeia-Hatulia tanba rendimentu di'ak tebes folin liu kafé.
“Vanila ne’e la fasil hanesan produsaun sira seluk, tanba kuda ema hotu bele kuda, maibé too atu fó kaben mak problema boot ida, nune’e susar uitoan, maibé Ministériu Agrikultura Peska sei tau atensaun no sosializasaun liután tanba vanila nia rendimentu kapás,” hatutan nia.
Nia dehan, ba oin sei servisu hamutuk ho Kooperativa Kafé Timor (CCT-Sigla Portugal) atu hadi’a kualidade kafé ba povu agrikultura sira nian ba futuru sei tau importánsia mós bá produtu vanila no maek. (*)