Print this page

Depende Ba Foos Vietname, TL sei Hetan Dezastre

By August 19, 2020 3830
Ro ne'ebe tula foos husi Vietname to'o ona iha portu Dili Ro ne'ebe tula foos husi Vietname to'o ona iha portu Dili Foto suplai

Tempotimor (Dili) - Relasiona ho kondisaun Timor-Leste nian ne'ebé daudaun dependénsia ba importasaun foos husi estranjeiru mak, Diretór Jerál Estatístika husi Ministériu Finansas, Elias do Santos Ferreira hatete, kuandu nasaun Vietname mak hetan susar ruma Timor-Leste sei hetan dezastre.

"Ita depende importasaun foos husi Vietname mas Vietname mak hetan dezastre ruma, ne'e ita 'hela naran' kedas", dehan nia, iha knaar fatin, edifísiu Estatístika, Kaikoli, Tersa (18/08).

Tuir nia, kuandu impaktu foos maka afeta makaas, entaun kontribui kedas ba índise presu konsumidór.

"Tanba impaktu foos kuandu afeta munisípiu sira, ita tau hamutuk mak inflasaun nasionál nian sa'e kedas. Tanba ninia pezu ne'e husi foos nian barak liu kuaze 54% husi total presu item ne'ebé iha, nune'e kuandu foos ne'e mak sa'e afeta kedas", tenik nia. 

Diretór Jerál ne'e relata, bazeia ba rezultadu kolleta dadus presu merkaduria nian iha fulan-Jullu 2020 ninian, ne'ebé dadus hatudu inflasaun presu merkaduria sa'e ba 0.1% ne'ebé kontribui makaas husi inflasaun foos ho 1.7%. 

Maski nune'e, iha loron Kinta, (13/8) foos ne'ebe governu Timor- Leste liu husi Sentru Logiostika Nasional (CLN sigla portuguese) sosa husi Vietname mos tama ona mai Timor-Leste tula husi Ro’o ho naran M.V: MY HUNG to’o iha Portu Dili, tan ne'e, espera bele garante ona iha tempu balun. 

“Ohin ita mai iha nee atu sai testamuñia ba fos ne’ebé ita sosa iha tempu krize pandemia COVID 19, iha momentu ne’eba nasaun hotu-hotu defisil atu fa’an fos, ho esforsu ne’ebé governu iha konsege halo negosiasaun ho governu Vietnam, sosa fos atu importa mai atu bele asegura ita nia stock nasional,” dehan Ministru MCAE. Eng. Joaquim Amaral, wainhira hamutuk ho Ministru Transporte no Komunikasoins, José Agustinho da Silva, Ministru Turizmu, Komérsiu no Indústria, José Lucas do Carmo da Silva no reprezentante WFP iha Timor-Leste ba hare foos ne'e to'o ona iha Portu Dili (13/8).

Rate this item
(3 votes)
Last modified on Wednesday, 19 August 2020 18:09
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items