Diretor Jeral Estatistika, Elias do Santos Ferreira relata, dadus inflasaun ne'ebé sa'e 0.1% ne'e, kontribuisaun mai husi presu foos ne'ebé sa'e.
"Diresaun estatístika husi Ministériu Finansas kada fulan sempre kolleta dadus presu merkadoria hodi nune'e fulan-fulan lansa rezultadu merkadu sira iha Dili no munísipiu 12 inklui RAEOA, nune'e, ohin ami publika dadus mensál ba fulan-Jullu 2020 ne'ebé dadus ne'e hatudu katak, inflasaun ne'e sae 0.1%, hanesan moos ho fulan kotuk liuba", dehan nia, iha knaar fatin, edifísiu Estatístika, Kaikoli, Tersa (18/08).
Nia esplika, husi 0.1% ne'e kontribuisaun mai husi presu foos ne'ebé sa'e 1.7%, masin-midar, marmelada, xokolate sa'e 1.8% no ai-fuan sa'e 0.1%, maibé hanesan modo tahan, mantolun, mina no na'an ne'e balun menus 1% no 0.1%, tanba ne'e kontribuisaun husi inflasaun 0.1% ne'e maioria mai husi hahán.
"Tanba, depois ita haree fulan ba fulan presu merkadoria ne'e foos sa'e hanesan uluk foos 25 kilo balun $12 maibé agora sa'e ba $13 maibé, agora haree la'o di'ak fali ona tanba loron hirak liu-ba foos husi Vietname tama mai Timor-Leste no planu governu nian atu fó foos ne'e ba povu kbit laek iha área rural, tan ne'e presu foos mak tenke kuidadu didi'ak tanba, see presu sa'e automatikamente povu iha área rurál labele asesu ba foos mak konserteza ki'ak aumenta", nia relata.
Kompara ba anualmente entre Jullu 2020 no Jullu tinan 2019, inflasaun 0.8% no kontribuisaun maioria mai husi edukasaun 2.6% maibé, seluk hanesan tabaku, alkol no trasporte ne'e hetan inflasaun tanba, presu mina mundiál tun fali ba 30% tanba ne'e, haree ba transporte deflasaun.
"Ita haree liuliu ba entre Covid-19 ne'e, iha fulan-Marsu inflasaun 0.3% no iha Abríl 0.1% depois iha Maiu sa'e fali ba 0.2% iha Juñu 1.1% hanesan mos fulan-Jullu 0.1%. Ami hanoin presu normál depois iha politika governu nian hakarak inflasaun tenke menus husi 4% kada tinan, see haree ba tinan lima ka neen ba kotuk ita-nia inflasaun menus husi 4%", nia esplika. (*)