Prezidente Elaborasaun Planu Rekuperasaun Ekonómika, Rui Augusto Gomes hatete, orsamentu ne'e ho intesaun boot tenke aloka ba setór agrikultura, saúde, edukasaun, bee moos no abitasaun para bele rekupera fali ekonomia ne'ebé tun ona.

"Ami tau proposta tetu fiskál tinan 2021, orsamentu billaun $1.7 ka 1.8, tanba ne'e presiza atu rekupera buat ne'ebé ita lakon, agora depende ba estrutura orsamentu ne'e rasik. Orsamentu boot ne'e ba liu agrikultura, saúde, edukasaun, bee moos no abitasaun, ida ne'e mak komponente sira ne'ebé boot ami sujere iha planu rekuperasaun ekonómika", dehan nia, hafoin soru-mutu ho Primeiru Ministru, Taur Matan Ruak, iha Palásiu Governu, Tersa (18/08).

Nune'e, iha soru-mutu ho xefe governu, komisaun elaborasaun planu rekuperasaun ekonómika ofisialmente entrega ona dokumentu.

"Primeiru Ministru konvida ami mai halo serimónia termu mandatu tanba, mandatu ba komisaun ne'e remata ona. Ofisialmente ami entrega ona planu rekuperasaun ekonómika ba VIII Governu Konstitusionál", tenik nia.

Rui dehan, agora Unidade Planeamentu Monitorizasaun Avaliasaun (UPMA) halo daudaun ajustamentu kona-ba medida sira ne'e, oinsá indikador sira transforma ba atividade no orsamentasaun hahú iha OJE tinan 2021 ba oin.

"Fundu planu ida ne'e foku efisentru mak ema, ita valoriza liu ba ema nia bens estar, saúde, edukasaun para oinsa mak tau prioridade makaas liubá setór sira ne'ebé ajuda ema para iha oportunidade barak atu sira bele hala'o sira-nia moris ho dignu", tenik nia.

Komisaun ba elaborasaun planu rekuperasaun ekonómika mós garante medida hotu ne'ebé atu rekupera ekonomia iha tinan 2021 ba oin.

"Ami mos asegura medida sira ne'e para bele garante ema nia servisu empregu bele iha no sira-nia rendimentu no empreza sira labele taka maibé, sira ativu nafatin iha merkadu nune'e mós fó empregu barak ba joven ka traballador sira, tanba empregu mak kresimentu ekonomiku bele akontese", hateten Rui.

Tuir nia, rekuperasaun ne'e bele di'ak maibé, depende ba ezekusaun medida ne'ebé komisaun rekuperasaun ekonómika propoin ba governu.

Nia esplika, planu ne'ebé entrega ba governu foku liu-ba segmentu sira ne'ebé hetan impaktu makaas husi Covid-19, tanba introdus medida sira hanesan konfinamentu, kuarentena buat sira ne'e hotu obriga empreza barak redus volume atividade, entaun implikasaun traballadór balun deskansa, tan ne'e tenta atu sira labele lakon sira-nia servisu no tenke mantein nafatin hanesan uluk. (*)