Kompañia Santos Desidi Fura Tan Mina Matan 3 iha Tasi Laran

Projeitu Bayu-Undan Iha Tasi Laran Ne'ebé Operadór Husi Kompañia Santos Projeitu Bayu-Undan Iha Tasi Laran Ne'ebé Operadór Husi Kompañia Santos Foto Facebook

Tempotimor (Dili)-Tuir istimasaun ba produsaun mina Bayu Undang sei maran iha tinan 2022, tan ne'e, kompañia Santos LDA desidi atu fura tan mina matan tolu ho orsamentu $200 milaun ital, atu bele asegura produsaun refere ba tinan ida tan.

Prezidente kompañia Santos LDA, José Lobato hatete, durante enkntru, ko'alia ho Ministru Prezidensia Konsellu Ministru (MPKM), Fidelis Leite Magalhães, kona-ba situasaun Bayu Undang ne'ebé kompañia Santos sai partisipasaun boot kuaze pursentu 60 liu no sai mos operador.

"Ami hato'o mos planu investimentu balun ne'ebé Santos hanoin relasaun ho Bayu undang, kompañia ConocoPhillips ho Santos iha buat ida ne'ebé atu hanesan istimasaun ba produsaun Bayu undang ninian ho mina matan ne'ebé iha maizoumenus to'o janeiru 2022 tuir istimasaun klaru ne'ebé iha, dalaruma bele akontese antes 2022 no bele mos akontese depois iha 2023," dehan Nia hafoiin hasoru-malu ho MPKM Fidelis iha palasiu governu, kinta (13/08).

Tuir Nia, Diferensia kompañia ConocoPhillips ho Santos mak ida la iha disponibilidade atu liu tan Bayu undang no kompañia Santos iha hanoin atu investe tan.

Nune'e, kompañia Santos, atu halo investimentu mak baku tan mina matan tolu ho orsamentu maizoumenus $200 milaun ital, no neste momentu iha mos diskusaun ho ANPM ne'ebé nu'udár regulador seitor petroliu ninian.

"Se investimentu ne'e aprova duni husi ANPM entaun ita bele dada naruk tan produsaun mina ninian maizoumenus tinan ida tan, ida ne'e mak investimentu ne'ebé ami hato'o ba Ministru Prezidensia Konsellu Ministru, se imi nota antes ne'e ami lori ConocoPhillips mai esplika ba Timor tomak katak, istimasaun produsaun mak ita hanoin janeiru 2022 ho mina matan ne'ebé iha tiha ona, se ita baku tan mina matan, entaun bele dada naruk tan produsaun ne'e to'o tinan tolu",tenik nia.

Tuir planu ne'ebé kompañia Santos atu fura tan mina matan mak, Nia dehan, sei fura iha Bayu Undang la'os iha fatin seluk.

"Mina matan ne'e tenki baku iha Bayu undang tanba, kontratu ne'ebé kompañia kaer mak Bayu undang labele iha fatin seluk", nia salienta.

Nia dehan, orsamentu ne'ebé atu investe, hodi fura tan mina matan tolu ne'e, mai husi kompañia hirak ne'ebé tama iha Bayu Undang.

"Orsamentu ne'ebé atu fura tan mina matan tolu ne'e, iha seitor petroliu estadu mak na'in ba rikusoin soke investimentu husi kompañia sira mak hatama osan entaun, ko'alia kona-ba Bayu undang la'os Santos de'it maibé mos iha kompañia sira seluk ne'ebé mak tama iha Bayu undang entaun sira mos teki kontribui ba orsamentu", nia akresenta.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.