Elizario Fereira ne’ebé hetan fiar husi Primeiru Ministru Taur Matan Ruak hodi lidera SEKooP, iha komitementu ne’ebé boot tebes hodi apoiu dezenvolvimentu kooperativa sira.

Sekretariu Estadu Elizariu hatete, durante ninia mandatu, SEKooP nia serbisu sei orienta liu ba atu harii, hadia no hametin kooperativa sira iha Timor-Leste.

“Durante ne’e ha’u-nia mandatu iha SEKooP, ami-nia serbisu orienta liu ba, prímeiru, atu harii, segundu ema dehan hadia, terseiru, hametin, haburas, habelar, hamoos. Signifika, kooperativa sira ne'ebé funsiona antes ona, ladun lao, presiza hadi’a,” dehan Elizariu iha nia knar fatin, Akait, Kinta (06/08).

Nia hatete, atu bele atinze serbisu hirak ne’e, nia hatete, etapa dahuluk SEKooP sei fó formasaun ba kooperativa sira, atu sira bele iha koñesimentu ne’ebé di’ak ba sira-nia serbisu rasik.

Hafoin hetan formasaun, nia hatutan, SEKooP mós sei kompleta ho apoiu ekipamentu balun ba sira atu sira bele la’o di’ak liu tan.

Tuir dadus, Elizariu dehan, daudauk ne’e kooperativa ne’ebé eziste iha TL hamutuk 224, kompostu husi kooperativa kreditu 137 no naun-kreditu ka naun-produtivu 77.

Husi total kooperativa ne’e, nia hatete, membru ne'ebé adere ba kooperativa kréditu kuaze na’in rihun 47, kompostu husi kooperativa kreditu kuaze na’in rihun 30 no kooperativa naun-kreditu na’in rihun 17.

Maske nune’e, nia hatete, tuir dadus, husi total kooperativa kreditu 137, iha kooperativa 87 de’it mak funsiona.

Tuir nia, ida ne’e akontese tanba tanba bazeia ba ninia prinsípiu rasik, prinsípiu internasional kooperativa nian, la depende ba instituisaun ruma, maske iha kooperativa 42 mak funsiona instituisaun, tanba sira iha sede rasik, iha kapital rasik, no la depende ba ema ruma.

Maske iha ona kooperativa lubuk ida, maibé Elizariu dehan, nia parte iha planu atu harii tan kooperativa iha Suku no Postu Administrativu ne’ebé seidauk iha kooperativa.

“Atu harii mós kooperativa kréditu no akomoda mós ba sira, ho obejetivu atu diversifika ekonómia iha nível baze, no mós atu fó moris ba ekonómia, liu-liu iha nível suku ka aldeia sira bazeia ba poténsia ne'ebé sira iha nune'e bele promove kriasaun kooperativa komunitária,” nia esplika.

Elizariu hatete, kooperativa komunitária tenke bazeia ba poténsia ne’ebé suku sira rasik iha. Sé suku ida iha kapasidade hakiak animal, sei hamosu grupu hakiak animal rua, tolu ka haat, depende ba inisiativa sosiedade ninian rasik.

"Agora, iha suku ne'e nia poténsia par atu halo negósiu, normalmente mosu koopetiva komérsiu ka konsumu iha nível ne'ebá, entaun ida ne’e mak atu promove oinsá mak bele mobiliza ema hotu partisipa iha nível kooperativa.”

“Se suku ida iha kooperativa rua, ho grupu ne'e inisia 10, signifika katak basta deit hahú ho ema 3.900, ida ne'e fulan ida de'it lori ema ida, ne'e to'o 2023 ne'e bele atinje 285 mill membrus adere ba kooperativa," nia esplika.

Atu bele apoiu kriasaun kooperativa foun, nia dehan, SEKooP sei promove kapitalizasaun liu husi liña de kréditu to'o iha sira-nia liman ho 3 pursentu kada tinan, atu bele asegura oinsá asesu ba kapitál, asegura produsaun ba kooperativa sira-nia atividade.

Aleinde ne’e, nia hatutan, SEKoop mós sei buka merkadu hodi promove sira-nia produtu ne'ebé mak iha, inklui promove merkadu fronteira atu nune'e bele fó asesu ka benefísiu ekonómiku ba populasaun sira ne'ebé hela iha fronteira.