Ministru Transporte no Komunikasaun José Agostinho da Silva hatete, durante ne’e ekipa interministerial haree no update prosesu konstrusaun aeroportu Komoro.

"Ita-nia orsamentu ne'ebé preve ba konstrusaun aeroportu ne'e iha fontes barak, balun iha serteza, informasaun balun seidauk. Mezmu hanesan ne'e, ita esforsu par atu nune’e inisiu tinan 2021 bele aselera ona konstrusaun aeroportu internasional," dehan nia hafoin reuniaun ho Primeiru Ministru Taur Matan Ruak iha palasiu governu, Segunda (27/07).

Nia hatete, iha semana kotuk, ekipa interministerial halo audensia ho Embaixadór Japaun iha Timor-Leste hodi koalia kona-ba apoiu tokon $44 husi Japaun ba konstrusaun aeroportu Komoro.

Aleinde governu Japaun, nia hatutan, ba konstrusaun aeroportu Komoro, hetan mós apoiu husi IFC no GPD Australia.

"Iha fulan hirak liu ba parte ADB asina emprestimu, hakarak investe kuaze tokon $6 no governu Timor-Leste mós investe tokon $30, agora ita iha serteza osan tokon $130 mais konstrusaun aeroportu ne'e rasik presiza valor aproxima tokon $485 no halo estimasaun kasar karik besik tokon $500, ne'e investimentu ida ne'ebé boot," dehan nia.

Nia hatutan, ekipa teknika integradu sei haree ba asuntu ne’e, nune’e bainhira konstrusaun ne’e hala’o bele hetan rezultadu ne’ebé di’ak.

“Iha kualidade no prienxe rekezitus padraun internasional par aban-bainrua iha aeroportu ida ke di’ak duni ho nia kualidade no mós bele fasilita movimentu transporte aero, no mós oinsa mak atu rekola mós reseitas," dehan nia.