Maske Timor-Leste deklara ona “livre” husi Covid-19, maibé virus ne’e sei fó ameasa, tanba virus ne’e sei sirkula maka’as iha nasaun barak iha mundu.
Tuir Reitór IOB, iha tempu agora, governu Timor-Leste presiza tebes atu tau-matan ho seriu ba pandemia Covid-19 hodi nune’e bele evita virus refere tama Timor-Leste.
Aleinde ne’e, nia dehan, asuntu seluk ne’ebé importante seluk mak salva fundu petroliferu.
Tuir nia, kada tinan FP kontinua menus tanba governasaun Timor-Leste gasta de’it osan maibé la investe iha area produtivu sira.
“Situasaun Timor-Leste agora dadaun ne’e presiza buat rua ne’ebé ita tenke tau-matan. Primeiro, ita tenke rezolve uluk lai situasaun pandemia Covid-19 liu husi dalan rua, kurativu ho preventive. Segundo, ita salva ita-nia fundu minarai, liu husi dalan saida? tenke iha dalan investimentu produtivu no gasta ho produtivu, tanba investimentu, gasta produtivu mak bele salva ita-nia ekonomia,” dehan nia iha Parlamentu Nasional, Kuarta (08/07).