Reprezentante kompana ne’ebé fornese hahan, Amaro Araujo hatete, maske periodu estadu emerjensia remata ona, maibé to’o ohin loron governu seidauk halo pagamentu ba sira.
"Ami husi kompana catering ho Otel sira durante iha estadu emerjensia ne'e ami mak fornese hahan ba kuarentena sira no fatin izolamentu, maibé to'o estadu emerjensia hotu ona mós governu seidauk halo pagamentu, tan ne'e mak ohin mai ezije iha Ministeriu Saude," informa Amaro ba jornalista sira iha Palasiu Sinzas, Ministeriu Saúde, Kaikoli-Dili, Kintta 02/07).
Durante ne’e, nia hatete, sira sempre ezije, no MS promete katak iha semana oin sei selu, maibé fulan rua ona seidauk selu.
"Agora ami mai ejiji pagamentu mak sira dehan foin mak halo verifikasaun, ne'e mak iha tempu ida ne'e hakarak mai atu hasoru direita Ministra Saude husu bainhira loos mak halo pagamentu ne'e," dehan nia.
Nia informa, iha kompana kuaze 51, kompostu husi catering 26 no otel 25, mak durante estadu emerjensia fornese hahan no oferese fatin.
Iha fatin hanesan, Diretor Aprovizonamentu (MS), Bernardino Armando da Silva hatete, pagamentu ba kompana hirak ne’e seidauk halo tanba MS sei hadia dokumentus kontratu.
Nia promete, iha semana oin, sei hala’o pagamentu ba kompana balun kompleta ona dokumentu sei haruka ba MF hodi halo pagamentu.
"Ami hadia ona dokumentu sira ne’e, semana oin pagamentu bele realiza ona," nia dehan.