Iha votasaun ba pedidu governu nian hodi halo levantamentu transferénsia extraordináriu husi FP, deputadu na’in 43 a favór, kontra zero no abstensaun 18.
Hafoin votasaun, deputada CNRT Fernanda Lay deklara, nia vota abstensaun tanba governu la konsege konvense nia.
"Ha'u vota abtensaun, ho rezerva hein katak relatóriu mai PN labele hanesan ho periodu anteriór, maibé tenke tuir periodu ke tuir lei, no mós ha'u lakohi impata reforsu ba tezouru hodi selu de'it ba mákina estadu ate ita iha OJE," dehan Fernanda iha PN, Tersa (23/06).
Deputadu CNRT seluk, Gabriel dos Santos dehan, nia vota abstensaun tanba fondu hasai dala rua ona, maibé iha ezekusaun halo diskriminasaun ba pesoál saúde sira ne'ebé durante ne'e servisu iha liña frente.
Aleinde ne’e, deputadu CNRT António de Carvalho dehan, nia vota abstensaun tanba Ministru nia esplikasaun mak la konvense nia.