"Rekopera Ekonomia presiza hadi'a uluk uma laran liuliu kona-ba aspeitu sira ne'ebé afeita ba produtividade rai laran no buat sira ne'ebé impede kresimentu ekonomia", dehan Rui Gomes hafoin simu pose husi Primeiru Ministru Taur Matan Ruak iha palasiu governu, kinta (18/06).
Nia mos dehan, Servisu atu rekopera ekonomia ne'e komplexu ituan, tanba barak iha inserteza nia laran.
"Servisu ne'e komplexu ituan, tanba preparasaun planu hodi enkaixa iha senariu makro-ekonomika mundial ida ne'ebé insertezas barak," nia esplika.
Nia mós akresenta, la'os fakar osan de'it ba ekonomia ne'ebé buras ona, maibé, presiza mantein ba rekoperasaun ida ne'ebé forte.
"Hau hare katak COVID-19 ne'e afeita makaas ba ema nia rendimentu no empregu. Entaun, foku makaas liu ba ema, hodi nune'e bele proteze no asegura katak, nia iha rendimentu no empregu la'ós vulneravel hanesan ohin servisu aban duni sai, maibe presiza empregu ida ne’ebé pozitivu", tenik nia.
Rui esklarese, komisaun rekoperasaun ekonomika sei hala'o servisu durante loron 60 de'it, tanba ne'e kuandu planu hotu ona, sei entrega ba konsellu Ministru atu desidi hodi halo aprovasaun.